1 րոպեի ընթերցում
Գյումրիում մարտի 1-ին կմեկնարկի սոցիալական բնակարանների շինարարությունը: Կկառուցվի 27 սոցիալական բնակարան։ Ինչպես տեղեկացնում է «Արմենպրես»-ը, ծրագիրն իրականացնում է «Փարոս» հիմնադրամը:
Ծրագրի ընթացքը քննարկելու համար Գյումրիի քաղաքապետի պաշտոնակատար Սարիկ Մինասյանը հանդիպել է «Փարոս» հիմնադրամի տնօրեն Փիթեր Աբաջյանի հետ:
Ծրագրի իրականացման համար Գյումրիի համայնքապետարանը հատկացրել է քաղաքի Լիսինյան 15 հասցեում գտնվող կիսակառույց շենքը: Շենքի առաջին հարկում անապահով երեխաների համար լինելու է արտադրական և ուսումնական կենտրոն:
Սոցիալական բնակարանները կհատկացվեն միայնակ, անժառանգ, տնակում բնակվող, երկրաշարժի հետևանքով անօթևան մնացած ընտանիքներին, որոնք մինչ օրս չեն օգտվել որևէ պետական աջակցությունից։
Ծրագրի ընդհանուր արժեքը 1.200.000 դոլար է, տևողությունը` 18 ամիս։