398.94
ՀՀ վարչապետի առաջ քաշած թեզը ճշմարիտ է, հակառակն ապացուցելու համար նախկին նախագահները փաստ ու փաստարկ չունեն. Սարգիս Խանդանյան
2 րոպեի ընթերցում
ԵՐԵՎԱՆ, 24 ԴԵԿՏԵՄԲԵՐԻ, ԱՐՄԵՆՊՐԵՍ։ Հայաստանի Ազգային ժողովի ՔՊ խմբակցության պատգամավոր Սարգիս Խանդանյանն արձագանքել է ՀՀ նախկին նախագահների կողմից վարչապետ Նիկոլ Փաշինյանի՝ ԼՂ հակամարտության թեմայով բանավեճի առաջարկը մերժելուն։
«Արմենպրես»-ի փոխանցմամբ՝ պատգամավորը թեմայի վերաբերյալ գրառում է արել «Ֆեյսբուք»-ի իր էջում։
«Տրամաբանությունը հուշում է, որ եթե մի հարցի շուրջ ունես համոզմունք և գիտես, որ դու ես ճշմարիտ, պիտի որ հակված լինես իմացածդ, դիրքորոշումդ տեղ հասցնել։
Հիմա հրապարակային առաջարկ ու հնարավորություն կա խոսելու մեր պետության պատմության ամենաառանցքային ու ամենացավոտ հարցի՝ Ղարաբաղյան բանակցային գործընթացի շուրջ և ողջ ճշմարտությունը վեր հանելու կամ հրապարակային դարձած բովանդակությանը հակադրվելու համար, բայց այդ բանակցություններին «փորձագիտական» մակարդակով տիրապետողները փախչում են խոսակցությունից։
Նույն տրամաբանությունը հուշում է մեկ բան. վարչապետ Նիկոլ Փաշինյանի առաջ քաշած թեզը ճշմարիտ է և ակնհայտ, որ հակառակն ապացուցելու համար նախկին նախագահները փաստ ու փաստարկ չունեն»,- գրել է Սարգիս Խանդանյանը:
Ավելի վաղ վարչապետ Նիկոլ Փաշինյանը «Ֆեյսբուք»-ի իր էջում գրել էր, որ Լեռնային Ղարաբաղի հակամարտության շուրջ բանակցությունները մեկնարկից ի վեր եղել են Լեռնային Ղարաբաղն Ադրբեջանի կազմ վերադարձնելու մասին։ Փաշինյանը թեմայի շուրջ բանավեճի էր հրավիրել նախկին նախագահներին:
ՀՀ նախկին նախագահների գրասենյակները հերքել են վարչապետի հայտարարությունն ու հրաժարվել բանավեճին մասնակցելու առաջարկից:
Փաշինյանը Հայաստանի նախկին նախագահներին, որոնք իրենց ներկայացուցիչների միջոցով մերժել են այդ թեմայով բանավիճելու առաջարկը, կոչ է արել ևս մեկ անգամ մտածել և օգտվել այդ հնարավորությունից:
Բաժանորդագրվեք մեր ալիքին Telegram-ում