Բացվել է Երևան - Վոլգոգրադ նոր ուղիղ չվերթ

ԵՐԵՎԱՆ, 23 ԴԵԿՏԵՄԲԵՐԻ, ԱՐՄԵՆՊՐԵՍ: Armenian Airlines ավիաընկերությունը բացել է նոր ուղիղ չվերթ՝ Երևանից դեպի Վոլգոգրադ։ «Արմենպրես»-ի փոխանցմամբ՝ այս մասին հայտնում են «Հայկական ավիաուղիներ»-ից՝ մանրամասնելով, որ թռիչքները կլինեն շաբաթական հաճախականությամբ՝  կիրակի օրերին։ 

«Armenian Airlines-ն այսօր չվերթներ են իրականացնում 8 ուղղությամբ, որից վեցը ՌԴ քաղաքներ։ Ռուսական շուկան այսօր ամենապահանջված և զարգացող ուղղություններից է։ Վոլգոգրադում ապրում է հայկական մեծ համայնք, բացի այդ սա նաև զբոսաշրջության զարգացման առումով է կարևոր»,-նշել է ավիաընկերության տնօրեն Արարատ Սարգսյանն ու հավելել, որ հաջորդ տարի կլինեն նոր ու հետաքրքիր ուղղություններ։ 

Երևան-Վոլգոգրադ թռիչքի տևողությունը 2 ժամ 15 րոպե է։ Ուղևորների ավիափոխադրումն իրականացվում է հարմարավետ Airbus 321  ինքնաթիռով՝  նախատեսված 220 ուղևորի համար: