Թրամփը ցանկանում է Իսրայելի և ՀԱՄԱՍ-ի միջև համաձայնության հասնել մինչև իր երդմնակալությունը

2 րոպեի ընթերցում

ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ։ ԱՄՆ ընտրված նախագահ Դոնալդ Թրամփը ցանկանում է Իսրայելի և պաղեստինյան ՀԱՄԱՍ արմատական շարժման միջև համաձայնության հասնել մինչև իր կողմից նախագահի պաշտոնի ստանձնումը։ «Արմենպրես»-ի փոխանցմամբ՝ այս մասին հայտարարել է Կատարի վարչապետ Մուհամեդ բեն Աբդուլռահման Ալ Թանին Sky News-ին տված հարցազրույցում։

«Մենք կապի մեջ ենք ապագա վարչակազմի և նախագահ Թրամփի խորհրդականների հետ։ Մենք փորձում ենք նրանց հետ համակարգել մեր ջանքերը։ Մենք բոլորս համակարծիք ենք և հույս ունենք հաղթահարել այս իրավիճակը նախքան նախագահի կողմից պաշտոնը ստանձնելը, քանի որ առաջնահերթություններ ունենք՝ կայունացնելու իրավիճակը Գազայում, մենք առաջնահերթություններ ունենք՝ վերականգնելու տարածաշրջանային անվտանգությունը», - ասել է նա։

Կատարի վարչապետը հաստատել է, որ տեղի ունեցած շփումներում Թրամփի թիմն ասել է, որ ցանկանում է այս հարցը լուծել մինչև երդմնակալությունը, որը տեղի կունենա հունվարի 20-ին։

«Մենք սա լսել ենք նրա թիմից, նրանց հետ իմ ունեցած զրույցներում նրանք ասել են, որ ցանկանում են, որ դա (խմբ.՝ Համասի հետ գործարքի հարցը) որոշվի հիմա, նույնիսկ այսօր», - ասել է նա։

Մուհամեդ բեն Աբդուլռահման Ալ Թանիի խոսքով՝ Գազայի հատվածում մարտերի դադարեցումը պահանջում է «առավելագույն ճնշում» բոլոր կողմերի վրա։ 

Խոսելով այն մասին, թե ինչ է նշանակում Թրամփի ընտրվելը Մերձավոր Արևելքի համար՝ Ալ Թանին ասել է, որ կան «շատ ռիսկեր», բայց նաև «շատ հնարավորություններ»։

«Հուսով եմ, որ բոլորը տեսնում են այս հնարավորությունները», - հավելել է նա:

Գազայում հրադադարի շուրջ բանակցություններն առայժմ ձախողվել են։

2023 թվականի հոկտեմբերի 7-ին ՀԱՄԱՍ-ի հարձակման հետևանքով Իսրայելում զոհվել էր 1200 մարդ, շուրջ 250 մարդ՝ գերեվարվել։ Գազայի հատվածում Իսրայելի պատասխան ռազմական գործողությունների հետևանքով պաղեստինցիների շրջանում զոհերի թիվը գերազանցել է 44 500-ը։

Հայերեն Русский

Շախմատի կանանց և տղամարդկանց առաջնություններում կայացել են 5-րդ տուրի պարտիաները

Անտոնիո Գուտերեշը խոստացել է մինչև հունվարի 27-ը հասնել իսրայելական զորքերի դուրսբերմանը հարավային Լիբանանից

Իսպանիայի հանգստավայրում լեռնադահուկային վերելակի վթարի հետևանքով տուժել է առնվազն 30 մարդ

Կառավարությունը վերանայում է նախադպրոցական ուսումնական հաստատություններում երեխաների սննդի հիգիենիկ պահանջները

Երևանի ավագանու «Քաղաքացիական պայմանագիր» խմբակցությունը քննարկել է քաղաքացիների բողոքները միասնական տոմսային համակարգի վերաբերյալ

Հունվարի 20-ի միջոցառումների անոնս

ՀՀ էկոնոմիկայի նախարարը մասնակցել է Պարենի և գյուղատնտեսության միջազգային ֆորումին

Կառավարությունը մետալուրգիական ոլորտի ընկերությունների համար նոր աջակցություն է նախատեսում

Վահրամ Սահակյանի նկատմամբ քրեական վարույթ է նախաձեռնվել

Կառավարությունը նախատեսում է երկարաձգել տարկետման տրամադրման համար դիմումների ընդունման ժամկետը