Հայաստանի ԱԳ փոխնախարարն ու Ֆրանսիայի Եվրոպայի հարցերով լիազոր նախարարը քննարկել են երկու երկրների հարաբերությունները
1 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ։ Ֆրանսիա կատարած աշխատանքային այցի շրջանակներում Հայաստանի արտաքին գործերի նախարարի տեղակալ Պարույր Հովհաննիսյանը հանդիպում է ունեցել Ֆրանսիայի Եվրոպայի հարցերով լիազոր նախարար Բենժամեն Հադադի հետ։
Ինչպես «Արմենպրես»-ը տեղեկանում է ՀՀ ԱԳՆ-ի տարածած հաղորդագրությունից, զրուցակիցները քննարկել են Հայաստան-Ֆրանսիա հարաբերությունների, ինչպես նաև Հայաստան-ԵՄ գործընկերության հետագա խորացման հնարավորությունները:
Կողմերը գոհունակություն են հայտնել Հայաստանի և Ֆրանսիայի միջև քաղաքական երկխոսության բարձր մակարդակի և մի շարք առանցքային ուղղություններով հայ-ֆրանսիական բազմոլորտ համագործակցության ամրապնդման կապակցությամբ։
Պարույր Հովհաննիսյանը զրուցակցին է ներկայացրել Հայաստանի և Ադրբեջանի միջև հարաբերությունների կարգավորման գործընթացը, ՀՀ կառավարության կողմից մշակված «Խաղաղության խաչմերուկ» նախագիծը։
Անդրադարձ է կատարվել նաև միջազգային և տարածաշրջանային օրակարգի արդի հարցերին: