2 րոպեի ընթերցում
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Վրաստանում իշխող «Վրացական երազանք» կուսակցությունը մտադիր է կրկին գործարկել նախագահ Սալոմե Զուրաբիշվիլիի իմփիչմենթի ընթացակարգը: «Արմենպրես»-ի փոխանցմամբ՝ այդ մասին լրագրողներին հայտնել է խորհրդարանի խոսնակ Շալվա Պապուաշվիլին։
«Խորհրդարանական մեծամասնությունը որոշում է ընդունել վերսկսել իմփիչմենթի ընթացակարգը», - նրա խոսքերն է մեջբերում «ՌԻԱ Նովոստի» գործակալությունը։
Պապուաշվիլին հավելել է, որ պատգամավորները Սահմանադրական դատարան կդիմեն դեռ մինչև խորհրդարանական ընտրությունները։
Պապուաշվիլիի խոսքով՝ «Վրացական երազանք»-ն այս քայլին գնացել է Զուրաբիշվիլիի արտասահմանյան այցերի պատճառով, որոնք նա շարունակում է կատարել առանց վարչապետի համաձայնության։ Խորհրդարանի խոսնակն ընդգծել է, որ թեև Զուրաբիշվիլիի լիազորությունների ժամկետը լրանում է այս տարի, սակայն կարևոր է, որ նա դառնա ոչ թե նախկին նախագահ, այլ հեռացվի իմփիչմենթի միջոցով։
Միևնույն ժամանակ նա վստահություն է հայտնել, որ հոկտեմբերի 26-ի ընտրությունների արդյունքներով «Վրացական երազանք»-ը սահմանադրական մեծամասնություն կստանա և նորընտիր խորհրդարանի առաջին իսկ նիստին ավարտին կհասցնի նախագահի իմփիչմենթի ընթացակարգը։
Զուրաբիշվիլիի և իշխող կուսակցության միջև տարաձայնությունների պատճառ են դարձել կառավարության հետ չհամաձայնեցված արտասահմանյան այցերը։ Անցյալ տարի «Վրացական երազանք»-ը հայց ներկայացրեց Սահմանադրական դատարան՝ պահանջելով նախագահի իմփիչմենթը, իսկ հոկտեմբերին դատարանը որոշեց, որ Զուրաբիշվիլին խախտել է օրենքը, սակայն իմփիչմենթ չկայացավ խորհրդարանում ձայների անբավարարության պատճառով։