ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի մրցակցության պաշտպանության հանձնաժողովը ռեփեր Սնուփ Դոգի՝ 2023 թվականի սեպտեմբերից հետաձգված ու մինչ օրս չկայացած համերգի ֆինանսավորման վերաբերյալ վարույթ է հարուցել՝ առերևույթ արգելված պետական օժանդակության հատկանիշներով։
«Արմենպրես»-ի փոխանցմամբ՝ Մրցակցության պաշտպանության հանձնաժողովը նման որոշում է ընդունել սեպտեմբերի 3-ին կայացած նիստում։
Նիստի ընթացքում ներկայացվել է ՄՊՀ համակենտրոնացումների և պետական օժանդակության գնահատման բաժնի` 2024 թ. օգոստոսի 29-ի զեկուցագիրը, որը վերաբերել է «Համաշխարհային աստղի հայաստանյան հյուրախաղեր» երաժշտական նախագծի շրջանակում Սնուփ Դոգի հայաստանյան համերգը կազմակերպելու նպատակով 2023 թ. ստեղծված «Դոպինգ Սփեյս» ՍՊԸ առերևույթ արգելված պետական օժանդակության տրամադրմանը:
Որոշման մեջ նշվում է, որ Սնուփ Դոգի համերգը կազմակերպելու նպատակով «Դոպինգ Սփեյս» ընկերությանը օժանդակություն տրամադրման հարցում դրսևորվել է ընտրողականություն, քանի որ ծրագրի իրականացումը վստահված է մեկ տնտեսավարողի՝ առանց մրցույթի: «Փաստացի առկա է դե յուրե ընտրողականություն, որի դեպքում օժանդակությունը նախատեսվում է տրամադրել միայն որոշակի սուբյեկտների, ինչն ուղղակիորեն բխում է օժանդակության տրամադրման հնարավորություն նախատեսող իրավանորմից»,- ասված է որոշման մեջ։
Նշվում է նաև, որ օժանդակության տրամադրմամբ տնտեսվարող սուբյեկտի համար ստեղծվում են ակնհայտ տնտեսական առավելություններ։ «Մասնավորապես, տոմսերի վաճառքից գոյացած հասույթն ամբողջությամբ տնօրինում է միակ տնտեսվարող սուբյեկտը, որին վստահվել է միջոցառման իրականացումը։ Չկան հստակ մեխանիզմներ՝ կապված տոմսերի վաճառքից ստացված գումարների բաշխման սխեմայի մասով»,- նշված է որոշման մեջ։
Մեկնաբանելով ՄՊՀ-ի որոշումը՝ կառույցի մամուլի խոսնակ Անի Սմբատյանն «Արմենպրես»-ին հայտնեց, որ պետական օժանդակություն տրամադրող մարմինները պետական օժանդակության բոլոր գործերն ուղարկում են Մրցակցության պաշտպանության հանձնաժողով՝ գնահատման։