Թուրքիայի ԱԳ նախարարը Նեթանյահուին մեղադրել է Գազայում ցեղասպանություն իրականացնելու մեջ
1 րոպեի ընթերցում
![Թուրքիայի ԱԳ նախարարը Նեթանյահուին մեղադրել է Գազայում ցեղասպանություն իրականացնելու մեջ](http://armenpress.am/resized/480/storage/images/articles/2024/09/05/TFjNAAjcLtSlhzolbzjlrHfmx92JSTZcXXSq7q6E.webp)
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Թուրքիայի արտգործնախարար Հաքան Ֆիդանը Հյուսիսային Մակեդոնիայի իր գործընկերոջ հետ համատեղ մամուլի ասուլիսում անդրադարձել է Գազայի հատվածում տեղի ունեցող իրադարձություններին և Իսրայելի վարչապետ Նեթանյահուին մեղադրել ցեղասպանություն իրականացնելու մեջ:
Ինչպես հաղորդում է «Արմենպրես»-ը, այդ մասին հայտնում է «Անադոլու» լրատվական գործակալությունը:
Ֆիդանը հայտարարել է, որ Իսրայելի վարչապետ Բենիամին Նեթանյահուն կրում է Գազայի հատվածում խաղաղ բնակչության դեմ իրականացված ցեղասպանության հիմնական պատասխանատվությունը։
«Ցեղասպանության գլխավոր մեղավորը (Գազայի հատվածում) Նեթանյահուն է։ Նա շարունակում է մահ ու սարսափ սերմանել իշխանությունը պահպանելու համար»,- ասել է նա:
Նրա խոսքով՝ Իսրայելի վարչապետը սաբոտաժ է անում բոլոր փորձերը, որոնք ուղղված են հրադադարին։
Ֆիդանը հայտարարել է, որ էսկալացիան տարածվել է դեպի Հորդանան գետի արևմտյան ափ, որտեղ իրավիճակը սրվում է Ալ-Աքսա մզկիթի դեմ սադրանքներով։
«Միջազգային հանրությունը պետք է կանգնեցնի Նեթանյահուին: Կոտորածի ֆոնին լռելը հավասարազոր է այս հանցագործությանը մեղսակից լինելուն»,- ընդգծել է Ֆիդանը։