«Պատերազմի մասնակիցների մասնագիտական ներուժի բացահայտում» ծրագրի շահառուն ավտոսպասարկման կետ է հիմնել
2 րոպեի ընթերցում
![«Պատերազմի մասնակիցների մասնագիտական ներուժի բացահայտում» ծրագրի շահառուն ավտոսպասարկման կետ է հիմնել](http://armenpress.am/resized/480/storage/images/articles/2024/08/26/tWJVI6xF2gzrtbbHHZ85gwCFlaf1RnsMmfnLuTmq.webp)
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: «Պատերազմի մասնակիցների մասնագիտական ներուժի բացահայտում» ծրագրի շահառու Նարեկ Սարգսյանն ավտոսպասարկման կետ է հիմնել: «Արմենպրես»-ն այս մասին տեղեկանում է «Իմ քայլը» հիմնադրամի տարածած հաղորդագրությունից, որտեղ նշվում է, որ 22-ամյա Նարեկ Սարգսյանն արդեն հասցրել է ավտոմեխանիկի 6 տարվա փորձ ձեռք բերել։
«Մեքենաներ է նորոգում 14 տարեկանից։ Իր հիմնական աշխատանքով չի զբաղվել միայն բանակում ծառայելու և վիրավորումից հետո վերականգնողական կուրսեր անցնելու շրջանում»,- նշված է հաղորդագրության մեջ:
Նարեկ Սարգսյանը ծնվել և ապրում է Արմավիրի մարզի Աղավնատուն գյուղում։ 44-օրյա պատերազմի ժամանակ ընդամենը մի քանի ամսվա ծառայող էր։ Նարեկը հրազենաբեկորային վիրավորում է ստացել թևի շրջանում։
«Իմ քայլը» հիմնադրամի «Պատերազմի մասնակիցների մասնագիտական ներուժի բացահայտում» ծրագրի մասին տեղեկանալուց հետո Նարեկը որոշել է մասնակցել ծրագրին։ Կողմնորոշման ճամբարի արդյունքում մշակել է անհատական զարգացման պլան, որն էլ, հիմք ընդունելով, մասնակցել է բիզնեսի պլանավորման և կառավարման դասընթացի ու ներկայացրել ավտոսպասարկման կետ հիմնելու բիզնես պլան։ Սեփական սպասարկման կետն ունենալու համար Նարեկին մի շարք սարքավորումներ ու գործիքներ էին անհրաժեշտ, ինչն էլ ստացել է հիմնադրամից: