ԿԽՄԿ ներկայացուցիչները հերթական անգամ տեսակցել են Բաքվում պահվող հայ անձանց
2 րոպեի ընթերցում
![ԿԽՄԿ ներկայացուցիչները հերթական անգամ տեսակցել են Բաքվում պահվող հայ անձանց](http://armenpress.am/resized/480/storage/images/articles/2024/08/26/KWPJk6MrK4RrFDirE1GXwfudpt5K2PrYowx1Du2P.webp)
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ։ Կարմիր խաչի միջազգային կոմիտեի (ԿԽՄԿ) ներկայացուցիչներն օգոստոսին հերթական անգամ տեսակցել են Բաքվում պահվող հայերին, որոնց անունները հաստատված են Ադրբեջանի կողմից։
«Արմենպրես»-ի հետ զրույցում այս մասին հայտնեց Կարմիր խաչի հայաստանյան գրասենյակի հաղորդակցության ծրագրերի պատասխանատու Զառա Ամատունին։
«Անազատության մեջ գտնվող բոլոր հայերն, ովքեր գտնվում են Ադրբեջանում և որոնց անունները հաստատել են երկրի իշխանությունները, ընդգրկվել են այդ տեսակցության մեջ»,-իր խոսքում նշեց Ամատունին։
Նա նաև հավելեց, որ այդ անձինք կապ են հաստատել իրենց հարազատների հետ։
Ադրբեջանը հաստատում է իր մոտ 23 հայ գերու առկայությունը: Բաքվում ապօրինի պահվող անձանց թվում են նաև Լեռնային Ղարաբաղի նախկին նախագահները՝ Արկադի Ղուկասյանը, Բակո Սահակյանը, Արայիկ Հարությունյանը, ինչպես նաև ԼՂ նախկին պետնախարար Ռուբեն Վարդանյանը, ԱԺ նախագահի պաշտոնը զբաղեցրած Դավիթ Իշխանյանը, պաշտպանության բանակի նախկին հրամանատար Լևոն Մնացականյանը, ԱԳ նախկին նախարար Դավիթ Բաբայանը, ՊԲ նախարարի նախկին տեղակալ Դավիթ Մանուկյանը, որոնց Ադրբեջանն ապօրինի ձերբակալել և կեղծ մեղադրանքներ է առաջադրել 2023 թվականի սեպտեմբերին Լեռնային Ղարաբաղի դեմ ռազմական ագրեսիայից հետո։