Ադրբեջանի Ղազախի շրջանում ականի պայթյունից վիրավորվել է 4 մարդ
1 րոպեի ընթերցում
![Ադրբեջանի Ղազախի շրջանում ականի պայթյունից վիրավորվել է 4 մարդ](http://armenpress.am/resized/480/storage/images/articles/2024/08/02/qdzFCitpfO8j91MTc2x0AC59SkCJfv330s9h55SP.webp)
ԵՐԵՎԱՆ, 2 ՕԳՈՍՏՈՍԻ, ԱՐՄԵՆՊՐԵՍ։ Ադրբեջանի Ղազախի շրջանի՝ Հայաստանի հետ սահմանին գտնվող Քըզըլհաջիլի գյուղում, որը Բաքվին է փոխանցվել 2024 թվականի ապրիլի 19-ի՝ սահմանազատման մասին երկու երկրների միջև ձեռք բերված պայմանավորվածության հիման վրա, ականի պայթյունի հետևանքով վիրավորվել է չորս մարդ։
«Արմենպրես»-ի հաղորդմամբ՝ այս մասին հայտնում են ադրբեջանական լրատվամիջոցները՝ հավելելով, որ վիրավորների թվում են ադրբեջանցի մեկ սահմանապահ և Ադրբեջանի հակաականային գործողությունների գործակալության (ANAMA) երեք աշխատակից։
«Հակահետևակային ականի պայթյունի հետևանքով ոտքից վիրավորվել են պետական սահմանապահ ծառայության ենթասպա Հայալ Ահադլին և ANAMA-ի աշխատակից Աֆիգ Մեհդիզադեն։ Բեկորային վնասվածքներ են ստացել նաև գործակալության աշխատակիցներ՝ Ալեքբերով Էլչին Իլհամ օղլուն և Միրզոև Յավեր Գերայ օղլուն», - նշված է Ադրբեջանի գլխավոր դատախազության, Պետական սահմանային ծառայության և ականազերծման գործակալության (ANAMA) համատեղ հաղորդագրության մեջ։
Հաղորդվում է, որ տուժածները տեղափոխվել են հիվանդանոց։ Նրանց կյանքին վտանգ չի սպառնում։