Չինաստանը հայտարարել է Ասիայում ինտեգրումը խորացնելու և մատակարարումները պաշտպանելու ցանկության մասին

ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Չինաստանի իշխանությունները ասիական տարածաշրջանի երկրներին առաջարկում են ամրապնդել տնտեսական ինտեգրումը և պատրաստ են համագործակցել միջազգային մատակարարման շղթաները պաշտպանելու համար: 

Ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին  հայտարարել է Չինաստանի արտգործնախարար Վան Յին՝ Վիենտյանում Հարավարևելյան Ասիայի երկրների ասոցիացիայի, Չինաստանի, Կորեայի Հանրապետության և Ճապոնիայի (10+3) արտգործնախարարների հանդիպմանը։

«Մենք պետք է խորացնենք տնտեսական ինտեգրումը և զարգացնենք տարածաշրջանային կապերը», - նախարարի խոսքերը մեջբերում է Չինաստանի ԱԳՆ կայքը։ «Չինաստանը պատրաստ է համագործակցել բոլոր համապատասխան կողմերի հետ՝ ապահովելու կայուն և անխափան մատակարարման շղթաները»,-նշել է նա։

ԱԳ նախարարը պարզաբանել է՝ 2024 թվականին Չինաստանը նախատեսում է անցկացնել 10+3 ձևաչափով արդյունաբերական շղթաների միացման կոնֆերանս։ «Չինաստանը լիովին կօգտվի տարածաշրջանային համապարփակ տնտեսական գործընկերությունից, կնպաստի այս համաձայնագրի որակյալ իրականացմանը, կարագացնի ՉԺՀ-ի, Ճապոնիայի և Կորեայի Հանրապետության միջև ազատ առևտրի գոտու ստեղծման շուրջ բանակցությունների վերսկսումը և շարունակաբար կբարելավի Արևելյան Ասիայում ինտեգրման մակարդակը»,- ​​հավելել է Վան Յին։