Սևան քաղաքում ընթանում են ճանապարհաշինական աշխատանքներ
3 րոպեի ընթերցում
![Սևան քաղաքում ընթանում են ճանապարհաշինական աշխատանքներ](http://armenpress.am/resized/480/storage/images/articles/2024/07/23/mrqyASpqLWmOrhclapgdlAmEiVaQRYTmi9DP0g3K.webp)
ԳԱՎԱՌ, 23 ՀՈՒԼԻՍԻ, ԱՐՄԵՆՊՐԵՍ։ Արդեն երրորդ ամիսն է, ինչ Գեղարքունիքի մարզի Սևան քաղաքում ՀՀ կառավարության կողմից իրականացվող սուբվենցիոն ծրագրերի շրջանակներում, սկսվել և ընթանում են ճանապարհաշինական աշխատանքներ։
Ինչպես «Արմենպրես»-ը տեղեկացավ Սևանի համայնքապետարանի աշխատակազմից, «Սևան համայնքի Սևան քաղաքի Խորհուրդների, Սունդուկյան, Մարզպետունի, Նալբանդյան, Մյասնիկյան, Նաիրյան փողոցների, Գագարին գյուղի Բաղրամյան և Կոմիտաս փողոցների հիմնանորոգման աշխատանքներ» սուբվենցիոն ծրագրի 1-ին փուլի շինարարական աշխատանքները կատարվել են 2023 թվականին, իսկ 2-րդ փուլը, որը ներառում է Մյասնիկյան, Նալբանդյան փողոցները, Նաիրյան փողոցի մայթերը, այս տարվա ճանապարհաշինական ծրագրերի ցանկում են:
Մյասնիկյան փողոցի հիմնանորոգման աշխատանքներն արդեն ավարտվել են։
Դրանք ներառել են 8083քառակուսի մետր տարածք:
Մյասնիկյան փողոցի հիմնանորոգման ծրագրի պայմանագրային արժեքը 95 միլիոն դրամ է, որի 50 տոկոսը համաֆինանսավորվում է համայնքային բյուջեի միջոցներով:
Ենթածրագրով նախատեսված հաջորդ շինարարական օբյեկտը Նաիրյան փողոցի մայթերի հիմնանորոգումն է, որի շինարարական աշխատանքները մեկնարկել են մայիս ամսին, և ծրագրով նախատեսված աշխատանքների կեսն արդեն կատարված է:
Ծրագրի պայմանագրային արժեքը 199 միլիոն 827 հազար 200 դրամ է, որի 50 տոկոսը ներդրվելու է համայնքի կողմից:
Մեկնարկել է նաև ենթածրագրով ներառված մյուս՝ Նալբանդյան փողոցի հիմնանորոգումը, որի մակերեսը կազմում է 14 հազար 602 քառակուսի մետր:
Նալբանդյան փողոցի հիմնանորոգումն ընդգրկում է Շինարարներ-Նալբանդյան փողոցներ խաչմերուկից մինչև Էներգետիկների փողոց և Աբովյան-Նալբանդյան փողոցների խաչմերուկից մինչև Նալբանդյան փողոցի սկզբնամաս հատվածները:
Փողոցի երկու հատվածների հիմնանորոգման աշխատանքների պայմանագրային արժեքն է 144 միլիոն 531 հազար 600 դրամ՝ համայնքային 50 տոկոս համաֆինանսավորմամբ:
Նախատեսված են հողային, ճանապարհային, մայթի պատվածքի, ուղիների մասով աշխատանքներ, եզրաքարերի ապամոնտաժում, եզրաքարերի տեղադրում, վերատեղադրում, դիտահորի բարձրացում և իջեցում, ասֆալտբետոնե շերտի տեղադրում և այլ աշխատանքներ:
Շինարարական աշխատանքների կապալառուն «Ճան Շին» ՍՊԸ-ն է:
Շինարարական աշխատանքները նախատեսված է ավարտել այս տարվա ընթացքում։
Խոսրով Խլղաթյան