Վարդենիս համայնքի Շատվան բնակավայրում կկառուցվի նոր բուժամանկաբարձական կետ

ԳԱՎԱՌ, 23 ՀՈՒԼԻՍԻ, ԱՐՄԵՆՊՐԵՍ։ Գեղարքունիքի մարզի Վարդենիս համայնքի Շատվան բնակավայրում, Կարմիր Խաչի Միջազգային Կոմիտեի միջոցներով, կկառուցվի բուժամանկաբարձական նոր կետ։

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, այս մասին խոսվել է Գեղարքունիքի մարզպետ Կարեն Սարգսյանի և  Կարմիր Խաչի Միջազգային Կոմիտեի ջրամատակարարման և բնակավայրերի ճարտարագետ Գևորգ Աֆյանի միջև կայացած հանդիպմանը, որի ընթացքում  քննարկվել են ԿԽՄԿ կողմից Գեղարքունիքի մարզի Վարդենիս համայնքի Շատվան բնակավայրում նոր բուժամանկաբարձական կետի կառուցման, մարզի  ևս չորս բուժամանկաբարձական կետերի և մեկ առողջության կենտրոնի շենքերի տանիքներին արևային ֆոտովոլտային կայանների տեղադրման ծրագրերը։ 

Շատվանում կառուցվող նոր ԲՄԿ շենքն ունենալու է բուժքրոջ և միջամտությունների սենյակ, սպասարան և սանհանգույց։ Ծրագրի շինարարական աշխատանքները կմեկնարկեն այս տարվա օգոստոս-սեպտեմբեր ամիսներին և ավարտին կհասցվեն մինչև տարեվերջ։ 

ԿԽՄԿ-ի կողմից այս տարվա ընթացքում նախատեսվում է 3 կիլովատտ  հզորության արևային ֆոտովոլտային կայանների տեղադրում Վարդենիս համայնքի Կութ, Ազատ, Նորաբակ և Դարանակ բնակավայրերի ԲՄԿ-ների շենքերի տանիքներին, որոնց շնորհիվ տվյալ կառույցները կգործեն էներգահամակարգից անկախ։  40 կիլովատտ հզորության արևային ֆոտովոլտային կայան կտեղադրվի Ճամբարակի առողջության կենտրոնի շենքի տանիքին։ 

Խոսրով Խլղաթյան