Կիբերանվտանգության խորացված դասընթացի 2-րդ թողարկման ամփոփումը ՀՖՀՀ-ում

 ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Հայաստանում ֆրանսիական համալսարանում (ՀՖՀՀ) հուլիսի 22-ին հավաստագրեր հանձնվեցին «Cybersecurity Advanced Training, Vol2» դասընթացի մասնակիցներին։ Դասընթացը կազմակերպվել էր Ձեռնարկությունների ինկուբատոր հիմնադրամի (EIF) և «Հայաստանի խաղաղության նախաձեռնության» (API) հետ համագործակցությամբ՝ նպատակ ունենալով բավարարել ձեռնարկությունների՝ իրենց ՏՏ համակարգերն ու հավելվածները վերահսկելու և ապահովելու օրեցօր աճող պահանջարկը:

Մեկ ամիս տևած կիբերանվտանգության ինտենսիվ դասընթացը (ընդհանուր 91 ժամ) համախմբեց ուսանողների և փորձառու մասնագետների այնպիսի կարևոր թեմաների շուրջ, ինչպիսիք են անվտանգության ռիսկերը, անվտանգության մշակման լավագույն պրակտիկան, կիբերհետաքննությունը և ցանցի ներթափանցման փորձարկման տեխնիկան: 

Մասնակիցներին դասավանդեցին անվանի բարձրակարգ մասնագետներ՝ EXAGENIUS-ի գործադիր տնօրեն և կիբերանվտանգության դասախոս Սեբաստիան Բարգիրջյանը և Orange Cloud for Business-ի VMware փորձագետ և Microsoft-ի հավաստագրված փորձագետ Նիկոլա Ռենարը։

Ամփոփիչ միջոցառման շրջանակում ՀՖՀՀ ռեկտոր Սալվա Նակուզին շնորհավորեց մասնակիցներին իրենց հաջողությունների համար՝ ընդգծելով այս ծրագրի ռազմավարական կարևորությունը․ «2023 թ․ աշնանը կայացած առաջին թողարկման հաջողությունից հետո մենք մեր գործընկերների հետ մեկնարկեցինք երկրորդ դասընթացը՝ Հայաստանում կիբերանվտանգության կարճ և արդիական դասընթացների աճող պահանջարկը բավարարելու համար։ Յուրաքանչյուր մոդուլ մշակվել է այնպես, որ լինի ինտերակտիվ և գործնական՝ մասնակիցներին հնարավորություն տալով ձեռք բերելու հմտություններ, որոնք ուղղակիորեն կիրառելի կլինեն իրենց մասնագիտական ոլորտում»։

API-ի նախագահ Վիգեն Փափազյանը թեև հավաստագրերի հանձնմանն այս անգամ անձամբ ներկա չէր, սակայն պատրաստակամ է շարունակական դարձնելու նախաձեռնությունը․

«Այս դասընթացը կարևոր քայլ է Հայաստանում կիբերանվտանգության հմտությունների ամրապնդմանն ուղղված «Հայաստանի խաղաղության նախաձեռնության» շարունակական ջանքերում։ Համագործակցելով տեղի փորձագետների և հաստատությունների հետ՝ նախաձեռնությունը նպատակ ունի նվազեցնելու երկրի խոցելիությունը կիբերհարձակումների նկատմամբ՝ ինչպես պետական, այնպես էլ մասնավոր հատվածներում։ Այս ոլորտում մեր ներգրավվածությունը շարունակական է լինելու»։ 

Ձեռնարկությունների ինկուբատոր հիմնադրամի «CyHub Armenia» նախաձեռնության ղեկավար Մարի Բարսեղյանը ևս ողջունեց մասնակիցներին․ «Տեղեկատվական տեխնոլոգիաներին զուգընթաց անընդհատ զարգացող աշխարհում կիբերանվտանգությունը շատ կարևոր, պահանջված և լայն հնարավորություններով ոլորտ է, և  հատկանշական է, որ Հայաստանում ոլորտի հանդեպ հետաքրքրությունը բավականին մեծ է։ Հույս ունեմ, որ այս դասընթացը մեծապես կնպաստի ձեր մասնագիտական աճին և ձեր առջև լայն հնարավորություններ կբացի որպես կիբերանվտանգության մասնագետ »։

Այս դասընթացի արդյունքում մասնակիցները ձեռք բերեցին կիբերանվտանգության մեխանիզմների խորը գիտելիքներ, ինչպես նաև անհրաժեշտ հմտություններ՝ պարբերաբար աուդիտի ենթարկելու ՏՏ ենթակառուցվածքները և ծրագրերը՝ խոցելիությունները հայտնաբերելու և վերացնելու, ինչպես նաև վտանգված համակարգերի հետաքննություն անցկացնելու և արդյունավետ հակաքայլեր իրականացնելու համար: 

Միջոցառման ավարտին գործընկերները քննարկեցին առաջիկայում նոր դասընթացի կազմակերպման հնարավորությունները։