ԱՀԿ-ն հայտարարել է Իրանում դենգե տենդի տարածման բարձր ռիսկի մասին

ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Առողջապահության համաշխարհային կազմակերպությունը (ԱՀԿ) բարձր է գնահատել Իրանում դենգե տենդի հետագա տարածման ռիսկը. երկրում հունիսի 14-ից մինչև հուլիսի 17-ը հիվանդության հայտնաբերված դեպքերի թիվը 2-ից հասել է 12-ի։ Այդ մասին «Արմենպրես»-ը տեղեկանում է ՏԱՍՍ գործակալությունից:

Ինչպես հայտնել է ԱՀԿ-ի Ժնևի կենտրոնակայանը, հունիսի 14-ին Իրանի իշխանությունները հայտնել են դենգեի առաջին երկու դեպքերի մասին:

«Համայնքի ներսում դենգեի տեղային փոխանցումը հաստատվել է Իրանի հարավի Հորմոզգանի նահանգի Բենդեր Լենգե քաղաքում», - նշել է ԱՀԿ-ն: 

2024 թվականի հուլիսի 17-ի դրությամբ երկրում դենգեի դեպքերի ընդհանուր թիվը հասել է 12-ի, դրանք բոլորն  արձանագրվել են Բենդեր Լենգեում:

Ավելի վաղ ԱՀԿ-ն աշխարհում դենգեի տարածման ռիսկը  գնահատել էր որպես բարձր՝ ընդգծելով, որ խոսքը վերաբերում է «հանրային առողջապահության գլոբալ սպառնալիքին»։ 

«Իրանի համար վտանգը նույնպես մեծ է երկրում (դենգե վիրուսը) տարածողների առկայության, այն տարածողների համար բարենպաստ կլիմայական պայմանների և դենգե տենդի շարունակական բռնկումներով երկրներից և էնդեմիկ շրջաններից Իրան մարդկանց տեղաշարժի պատճառով», - արձանագրել են կազմակերպությունում։ 

ԱՀԿ-ում բացատրել են, որ այդ հիվանդությունը «պոտենցիալ կերպով կարող է լուրջ վնաս հասցնել հանրային առողջապահությանը»։ 

Հիվանդության հիմնական տարածողներն են Aedes մոծակները, հիմնականում Aedes aegypti և ավելի փոքր չափով՝ Aedes albopictus մոծակները:

Իրանի առողջապահության նախարարությունը ձեռնարկել է «հիվանդանոցների պատրաստվածության բարձրացման միջոցներ»։ Իր հերթին, ԱՀԿ-ն աջակցություն է ցույց տալիս նախարարությանը՝ «հսկողության ուժեղացման, արագ ախտորոշման համար բժշկական պարագաների և միջոցների բաշխման, ուսուցման անցկացման  և ռիսկերի մասին իրազեկման միջոցառումների կազմակերպման» գործում:

Դենգեն վիրուսային վարակ է, որը գերակշռում է արևադարձային և մերձարևադարձային շրջաններում: Դրա ախտանշաններն են բարձր ջերմությունը, սրտխառնոցը, ցանը, գլխացավերը և գոտկատեղի ցավերը։ Տենդի հեմոռագիկ տարբերակն ուղեկցվում է ուժեղ ներքին արյունահոսություններով, որոնք առաջանում են արյան անոթների կոլապսից։ Ըստ գնահատումների՝ 3,8 միլիարդ մարդ ապրում է էնդեմիկ երկրներում, որոնց մեծ մասը գտնվում է Ասիայում, Աֆրիկայում և Ամերիկայում: Ըստ ԱՀԿ-ի՝ հիվանդացությունը, հավանաբար, կաճի քանակապես և աշխարհագրորեն կտարածվի՝ կլիմայի փոփոխության և ուրբանիզացիայի պատճառով։