ՀՀ-ում անցկացվելու է Միջխորհրդարանական միության երիտասարդ պատգամավորների համաժողովը. ԱԺ փոխնախագահը հանդիպել է Միջխորհրդարանական միության գլխավոր քարտուղարին

ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Նյու Յորքում՝ ՄԱԿ-ի կենտրոնակայանում Կայուն զարգացմանը նվիրված Բարձր մակարդակի քաղաքական ֆորումի շրջանակում ՀՀ ԱԺ նախագահի տեղակալ Հակոբ Արշակյանը հանդիպել է Միջխորհրդարանական միության գլխավոր քարտուղար Մարտին Չունգոնգի հետ:

Ինչպես «Արմենպրես»-ին տեղեկացրին ՀՀ Ազգային ժողովից, ԱԺ նախագահի տեղակալը ներկայացրել է տարածաշրջանային զարգացումները, առկա մարտահրավերները, ինչպես նաև անդրադարձել Ադրբեջանում գտնվող գերիների և պահվող այլ անձանց վերադարձին առնչվող խնդիրներին:

«ՀՀ-ն հավատում է, որ ուժեղ ժողովրդավարական պետությունը, որի առանցքում մարդու իրավունքներն են և օրենքի գերակայությունը, պետության և հասարակության դիմակայությունն ապահովելու խոշոր նախադրյալ է ընդդեմ բազում մարտահրավերների ու ճգնաժամերի»,- նշել է Հակոբ Արշակյանը:

Ըստ աղբյուրի՝ բարձր գնահատելով միջազգային գործընկերների ջանքերը Հայաստանի ու Ադրբեջանի միջև երկխոսությանը նպաստելու հարցում՝ ԱԺ նախագահի տեղակալն այդ առումով արժևորել է նաև Մարտին Չունգոնգի գործունեությունը:

Վերջինս կիսվել է Հայաստան իր կատարած այցի լավ տպավորություններով, ինչպես նաև անդրադարձել սեպտեմբերին Հայաստանում անցկացվելիք Միջխորհրդարանական միության երիտասարդ պատգամավորների 10-րդ համաժողովին:

«Հայաստանի խորհրդարանն ամենաերիտասարդականն է աշխարհում, և ես ուրախ եմ, որ Հայաստանում է անցկացվելու Միջխորհրդարանական միության երիտասարդ պատգամավորների 10-րդ համաժողովը»,- նշել է նա:

Միջխորհրդարանական միության գլխավոր քարտուղարն աջակցություն է հայտնել Հայաստանի և Ադերբեջանի միջև խաղաղության գործընթացին և հավելել, որ Միջխորհրդարանական միության կողմից ջանքեր կներդնեն գործընթացի զարգանալու համար:

Հանդիպման ավարտին Մարտին Չունգոնգը նշել է, որ ՀՀ Ազգային ժողովի և Միջխորհրդարանական միության միջև համագործակցությունը քաջալերող է, հայ պատգամավորներն ակտիվորեն ներգրավված են միության տարբեր մարմինների աշխատանքներում: