Չեմ կարող բառերով փոխանցել այդ էմոցիաները. Էլմիրա Կարապետյանը` ՕԽ ջահի փոխանցումավազքի մասին

ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Հայաստանի օլիմպիական հավաքականի անդամ, Փարիզ-2024-ի ջահի փոխանցումավազքի մասնակից  Էլմիրա Կարապետյանը կիսվել է առաջին տպավորություններով:

«Չեմ կարող բառերով փոխանցել այդ էմոցիաները: Մարմինդ ամբողջապես փշաքաղվում է այդ պահին: Հրաշալի էր կազմակերպված ամեն ինչ, գերպրոֆեսիոնալ: Շատ տպավորված եմ»,-«Արմենպրես»-ի հետ զրույցում ասաց Կարապետյանը:

Վերջինիս խոսքով` Ֆրանսիայում ՀՀ դեսպանատունն իր անմիջական մասնակցությունն է ունեցել կազմակերպչական հարցերում և օգնել է Կարապետյանին մասը դառնալու օլիմպիական գաղափարախոսության կարևոր մասը հանդիսացող փոխանցումավազքին: 

Հայաստանի օլիմպիական հավաքականի անդամ, հրաձիգ Էլմիրա Կարապետյանը մասնակցել է Օլիմպիական խաղերի կրակի փոխանցումավազքին: Էլմիրա Կարապետյանը Փարիզ-2024-ի ջահով վազել է Ֆրանսիայի հյուսիսում գտնվող Օ դը Սեն երկրամասի Վիլեր Կոտրեն համայնքում: