Մարտունի համայնքի մի շարք բնակավայրերի մշակույթի տների գույքի ձեռք բերման համար ՀՀ կառավարությունը համապատասխան գումար է հատկացրել

ԳԱՎԱՌ, 27 ՀՈՒՆԻՍԻ, ԱՐՄԵՆՊՐԵՍ։ ՀՀ կառավարության 2024 թվականի հունիսի 27-ի հերթական նիստում որոշում է կայացվել՝ 60 միլիոն դրամ հատկացնել Գեղարքունիքի մարզի Մարտունի համայնքի Մարտունի քաղաքի, Ծովինար, Ծակքար, Ձորագյուղ բնակավայրերի մշակույթի տների գույքի ձեռքբերման համար։ 

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմի քաղաքաշինության , հողաշինության և ենթակառուցվածքների կառավարման վարչությունից, Մարտունի համայնքի մշակույթի տունը վերանորոգվել է 2008 թվականին՝ «Լինսի» հիմնադրամի միջոցներով։ Փոխվել է շենքի տանիքը, կատարվել են ներքին հարդարման աշխատանքներ։ 

Ծովինար բնակավայրի մշակույթի տան կապիտալ վերանորոգման աշխատանքները մեկնարկել են 2020 թվականից։ Աշխատանքներն իրականացվում են սուբվենցիոն ծրագրերի շրջանակներում, որի համար 2020 թվականին հատկացվել է 10 միլիոն 534 հազար, 2021 թվականին՝ 12 միլիոն 295 400 հազար, 2022 թվականին՝ 19 միլիոն 980 հազար դրամ։  Շինարարական աշխատանքները դեռևս  ընթացքի մեջ են։ 

Ծակքարի մշակույթի կենտրոնը վերանորոգվել է 2022 թվականին՝ սուբվենցիոն ծրագրերի շրջանակներում։ Աշխատանքների համար հատկացվել է 80 միլիոն 280 հազար դրամ։ Մշակույթի կենտրոնի շինարարական աշխատանքները ևս գտնվում են ընթացքի մեջ։ 

Ձորագյուղի մշակույթի կենտրոնի հիմնանորոգման ծրագիրը մեկնարկել և ավարտվել է 2020 թվականին։ Այն իրականացվել է սուբվենցիոն ծրագրի շրջանակներում, որի համար ծախսվել է 52 միլիոն 766 364 հազար դրամ։ 

Գույքի ձեռքբերման ծրագիրը կիրականացվի այս տարվա ընթացքում։

Խոսրով Խլղաթյան