Բնագիտական և տեղեկատվական տեխնոլոգիաների լաբորատորիաներ՝ Արմավիրի մարզի հանրակրթական 88 դպրոցում
7 րոպեի ընթերցում
![Բնագիտական և տեղեկատվական տեխնոլոգիաների լաբորատորիաներ՝ Արմավիրի մարզի հանրակրթական 88 դպրոցում](http://armenpress.am/resized/480/storage/images/articles/2024/06/29/9yAzF2cKZFdyXTR4wVUGl5G4w6O1IFiONuxCud0R.webp)
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ։ Արմավիրի մարզի հանրակրթական դպրոցներում ազդարարվեց ՀՀ կառավարության նախաձեռնությամբ և Համաշխարհային բանկի ֆինանսավորմամբ իրականացվող ծրագրի շրջանակում բնագիտական, տեղեկատվական և հաղորդակցական տեխնոլոգիաներ, ճարտարագիտություն և մաթեմատիկա (ԲՏՃՄ) առարկաներ դասավանդող ուսուցիչների վերապատրաստման հնգօրյա դասընթացների մեկնարկը: «Արմենպրես»-ի թղթակցի հաղորդմամբ՝ այդ կապակցությամբ ՀՀ կրթության, գիտության, մշակույթի և սպորտի նախարար Ժաննա Անդրեասյանն այցելեց Վաղարշապատի թիվ 3 և թիվ 4 հիմնական դպրոցներ:
Ժաննա Անդրեասյանը ծանոթացավ այդ ուսումնական հաստատությունների պայմաններին, զրուցեց վերապատրաստվող ուսուցիչների հետ և նրանց ուշադրությունը հրավիրեց իրականցվող ծրագրի կարևորությանը:
«Շատ կարևոր ծրագիր ենք սկսում: Կառավարության ծրագրով առանձին ֆինանսավորում է սահմանված, որպեսզի մեր բոլոր դպրոցներն ունենան բնագիտական և տեղեկատվական տեխնոլոգիաների լաբորատորիաներ: Արմավիրի մարզն առաջիններից է ներառվել այս ծրագրում՝ սարքավորումներն արդեն տրամադրված են: Բոլորս պետք է ջանքեր գործադրենք, որպեսզի այս ներդրումը լինի արդյունավետ և սարքավորումներն իրապես դառնան կրթական գործընթացի մաս: Այդ աշխատանքը պետք է իրականացվի որոշակի միջավայրում, որն այսօր արդեն ձևավորված է»,-նշեց նախարարը:
Ժաննա Անդրեասյանն ուսուցիչներին կոչ արեց արդյունավետ և նպատակային օգտագործել տրամադրված սարքավորումները, դրանք ծառայեցնել իրական նպատակին, այլ ոչ թե խնամքով պահել փակ սենյակներում: «Այդ լաբորատորիաները չպետք է դառնան պահեստ, մնան առանց նախագծերի և դասընթացների, որովհետև դրանք կոչված են օգնելու աշակերտներին ավելի արդյունավետ իրացնել իրենց կարողությունները»,-ընդգծեց նախարարը՝ միաժամանակ հիշեցնելով, որ այս տարվա սեպտեմբերից նշված առարկաները դասավանդող ուսուցիչները ստանալու են 25 տոկոս հավելավճար:
Արդեն լրագրողների հետ զրույցում Ժաննա Անդրեասյանը նշեց. «Կառավարության ծրագրի կարևոր թիրախ է, որ մեր բոլոր դպրոցներն ունենան բնագիտական առարկաների և տեղեկատվական տեխնոլոգիաների լաբորատորիաներ: Արմավիրի մարզին դրանք արդեն տրամադրված են: Հիմա կարիք ունենք զարգացնելու ուսուցիչների կարողությունները, որպեսզի այդ սարքավորումները օգտագործվեն նպատակային և առաջին հերթին ի շահ մեր երեխաների որակյալ կրթության: Կար ուսուցիչների վերապատրաստման առանձին ծրագրի կարիք, որպեսզի նրանք կարողանան զարգացնել լաբորատորիաները կրթական գործընթացում օգտագործելու հմտությունները: Այսօր տրվեց ծրագրի մեկնարկը: Այն իրականացվելու է բոլոր մարզերում: Այս պահին մասնակից կդառնան Արմավիրի և Արագածոտնի մարզերի ուսուցիչները, այնուհետև ծրագիրը փուլային սկզբունքով կիրականացվի նաև մյուս մարզերի ուսուցիչների համար»:
ԿԳՄՍ նախարարը կարևորեց, որ ամբողջությամբ մշակվել են վերապատրաստման մոդուլները, որոնք տեղադրված են նաև առցանց հարթակում: Առանձին նախատեսվում է նաև տեսադասերի նկարահանում, որոնցում կներկայացվի մշակված փորձերի գործնական կիրառումը: Նշվեց, որ նախարարությունը միշտ պատրաստ է անհրաժեշտության դեպքում լրացուցիչ աջակցություն և խորհրդատվություն տրամադրել ուսուցիչներին:
Վերապատրաստման դասընթացներն իրականացվում են «Կրթական ծրագրերի կենտրոն» ԾԻԳ-ի հետ համատեղ: Նպատակն է զարգացնել լաբորատոր սարքավորումների գործարկման և բնագիտական լաբորատորիաներում ուսուցման կազմակերպման ուղղությամբ ուսուցիչների կարողությունները: Ծրագրի շրջանակում իրականացվելու է «Քիմիա», «Ֆիզիկա», «Կենսաբանություն», «Աշխարհագրություն» և «Տեղեկատվական տեխնոլոգիաներ» առարկաների շուրջ 1000 ուսուցչի վերապատրաստում:
Ուսուցիչների վերապատրաստումն իրականացնում են մրցույթի արդյունքում ընտրված փորձագետները, որոնցից մեկը «Արմենպրես»-ի թղթակցին հայտնեց՝ ուսուցիչները պետք է կարողանան համակարգել, մեկնաբանել, ներկայացնել հետազոտության վրա հիմնված տեղեկությունը և այդ ձեռքբերումներն օգտագործել ուսուցման գործընթացում: «Մեր ցանկացած գործունեություն, որը կապված է այստեղ ներառված գործնական և լաբորատոր աշխատանքների հետ, միտված է հետազոտական, հետազոտահեն կրթության ապահովմանը: Հետևաբար, պետք է կարողանանք կազմակերպել հետազոտություններ, հասկանանք հետազոտության յուրաքանչյուր փուլի նպատակը թե նախագծային ուսուցման, թե գործնական աշխատանքի շրջանակներում: Կարողանանք վարել, ղեկավարել հետազոտությունները և արդյունքում աշակերտների մոտ ձևավորել կարևոր կարողություններ»,-նշեց փորձագետը:
Ծրագիրն իրականացվում է ՀԲ-ի կողմից ֆինանսավորվող «Կրթության բարելավման ծրագրի լրացուցիչ ֆինանսավորում» վարկային ծրագրի «Հանրակրթական դպրոցների վերազինում» ենթաբաղադրիչի շրջանակում: Հանրակրթական դպրոցների դասավանդման և ուսուցման պայմանների բարելավման նպատակով ՀՀ մի քանի մարզերի դպրոցներում հիմնվել է շուրջ 160 լաբորատորիա, դրանք համալրվում են բնագիտական և ինժեներական լաբորատոր սարքավորումներով, անհրաժեշտ գույքով և ուսումնական նյութերով:
Արմավիրն այս ծրագրում ներառված առաջին մարզն է։ Այստեղ ամբողջությամբ ստեղծվել և կահավորվել են 88 դպրոցների լաբորատորիաներ:
Արմավիրի մարզպետի աշխատակազմի կրթության, մշակույթի և սպորտի վարչության պետ Սոնյա Բուդաղյանը, կարևորելով նման ծրագրի իրականացումը, նշեց, որ այն ավելի արդյունավետ և նպատակային կդարձնի ուսումնական գործընթացը:
«Կրթական ծրագրերի կենտրոն» ԾԻԳ-ի Տեղեկատվական և հաղորդակցական տեխնոլոգիաների բաժնի ղեկավար Հարություն Ղարիբջանյանն էլ նշեց, որ վերապատրաստման նյութերը վերաբերում են լաբորատոր սարքավորումների շահագործմանը և ընթացիկ սպասարկմանը, ինչպես նաև դասապրոցեսում դրանց օգտագործմանը՝ դասավանդման ժամանակակից մեթոդաբանության և թվային ուսումնաօժանդակ նյութերի կիրառմամբ:
Նա հայտնեց նաև, որ արդեն ոչ թե Համաշխարհային բանկի, այլ պետբյուջեի ֆինանսավորմամբ նմանատիպ ծրագիր իրականացվելու է հինգ մարզում՝ Արարատի, Կոտայքի, Լոռու, Շիրակի և Գեղարքունիքի: Այդ մարզերի դպրոցներում ստեղծվելու է ընդհանուր առմամբ 300 լաբորատորիա:
Հրայր Նազարյան
Լուսանկարները՝ Հայկ Մանուկյանի