1 րոպեի ընթերցում
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Մախաչկալայում և Դերբենտում իրականացված ահաբեկչությունների հետևանքով զոհերի թիվը հասել է 20-ի, վիրավորների թիվը՝ 46-ի: «Արմենպրես»-ի փոխանցմամբ՝ այս մասին հաղորդել է հանրապետության առողջապահության նախարարության մամուլի ծառայությունը։
«Երեկ հանրապետությունում տեղի ունեցած ահաբեկչական գործողության հետևանքով Մախաչկալայում և Դերբենտում տուժել է 46 մարդ, որոնց թվում կան ինչպես քաղաքացիական անձինք, այնպես էլ իրավապահ մարմինների աշխատողներ: Ցավոք, զոհվել է 20 մարդ, որոնց թվում նույնպես կան իրավապահ մարմինների աշխատողներ և քաղաքացիական անձինք», - հաղորդագրությունից հատված է մեջբերում «Ինտերֆաքս» գործակալությունը։
Հունիսի 23-ի երեկոյան ՌԴ սուբյեկտ Դաղստանի ներքին գործերի նախարարությունը հայտնել էր Դերբենտում սինագոգի և եկեղեցու, ինչպես նաև Մախաչկալայում ուղղափառ եկեղեցու և ճանապարհային ոստիկանության բաժանմունքի վրա հարձակման մասին։
Դաղստանում հակաահաբեկչական գործողության ռեժիմ է սահմանվել, երկու քաղաքներում էլ մարտերը շարունակվել են մինչև ուշ երեկո։
Հանրապետությունում եռօրյա սուգ է հայտարարվել։