Վրաստան

Մշակութային երկխոսություն՝ երկրների միջև. Դիլիջանում երկրորդ անգամ անցկացվեց «Միմինո» հայ-վրացական փառատոնը

5 րոպեի ընթերցում

Մշակութային երկխոսություն՝ երկրների միջև. Դիլիջանում երկրորդ անգամ անցկացվեց «Միմինո» հայ-վրացական փառատոնը

ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: «Միմինո» հայ-վրացական մշակութային խոհանոցային փառատոնը հունիսի 22-ին խորհրդանշական վայրում՝ Դիլիջանում, իր շուրջ էր համախմբել հարյուրավոր մարդկանց, որոնք հնարավորություն ունեին քաղաքի կենտրոնում համտեսել  համեղ ուտեստներ և ծանոթանալ պատրաստման եղանակներին:

Փառատոնի ավելի քան քառասուն տաղավարում, խոհանոցներից բացի, ներկայացված էին գյուղական բերքն ու բարիքը, ձեռքի աշխատանքներ՝ տիկնիկներ, զարդեր, աքսեսուարներ: Տոնական մթնոլորտն ամբողջացնելու համար ցուցահանդես-վաճառքին զուգահեռ նաև համերգային ծրագիր էր կազմակերպվել. ելույթներ էին ունենում Հայաստանի ու Վրաստանի պարային խմբերը, երգիչները։ 

«Արմենպրես»-ի թղթակցի հետ զրույցում «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանն ասաց՝ փառատոնի նպատակն է  երկու երկրների մշակութային ժառանգությունը հանրության լայն շրջանակին ներկայացնելու միջոցով երկխոսություն ծավալել հարևան, բարեկամ ազգերի միջև, ինչպես նաև նպաստել զբոսաշրջության զարգացմանը:

«Ցանկանում ենք ցույց տալ երկու ազգերի մշակութային ժառանգության համադրելիությունը և դրանով նաև շահույթ ապահովել և՛ Հայաստանի, և՛ Վրաստանի համար: Իրականում երկու երկրների մշակույթների հետ կապված հարցեր կան, որոնք շահարկվում են ոչ կոմպետենտ շրջանակում, և մենք ուզում ենք մասնագետներով պարզաբանել որոշ հարցեր: Մասնագիտական շրջանակում հասկանում են, որ հնարավոր չէ հազարամյակներով ապրել կողք կողքի, հարաբերվել, շփվել, լինել բարեկամ և ինչ-որ բան չվերցնել իրարից կամ չտալ: Մեր միջև նմանությունները, ընդհանրությունները մեր ընդհանուր հարստությունն են»,- շեշտեց Մամուլյանը:

Նրա խոսքով՝ ավաղ, վրացական տաղավարները դեռ քիչ են: «Եթե առաջին տարին մենք ունեինք վեց մասնակից, ապա այս տարի 12 տաղավար է մասնակցում Վրաստանից: Բոլորը չէ, որ խոհանոց են ներկայացնում: Վստահ եմ՝ հաջորդ տարի խոհարարների թիվը մեծանալու է»,- նշեց Սեդրակ Մամուլյանը:

Միջոցառումը կազմակերպվել է Դիլիջանում, քանի որ թեման «Միմինո» ֆիլմն է, որի գլխավոր դերերում հանդես են եկել սիրված դերասաններ Մհեր Մկրտչյանն ու Վախթանգ Կիկաբիձեն: «Մենք պետք է Դիլիջանում անպայման բացենք ծորակը, ասենք, որ այն աշխարհում երկրորդն է: Երբ վրացական կողմը նախաձեռնի «Միմինո» փառատոնը, այն կանցկացվի Թելավիում, քանի որ «Միմինո»-ի գլխավոր հերոսը Թելավիից էր: Կարծում եմ՝ այդ կինոնկարում լավագույնս են ներկայացվել մեր առանձնահատկություններն ու ընդհանրությունները, մեր աշխարհընկալումները»,- շեշտեց Մամուլյանը: 

Վրաստանի խոհարարների ասոցիացիայի նախագահ Լևանի Կոբիաշվիլին  շատ կարևորեց փառատոնի անցկացումը, քանի որ այն խորհրդանշում է Մհեր Մկրտչյանի և Վախթանգ Կիկաբիձեի բարեկամությունը: «Մենք մտածեցինք այս փառատոնը, որ շարունակենք երկու ժողովուրդների բարեկամությունը: Հույս ունենք, որ Թելավիում ևս կանցկացնենք այս փառատոնը»,- ասաց նա: Կոբիաշվիլին կարծում է՝ հայկական և վրացական ուտեստների  անուններն են նման, բաղադրիչները, սակայն համերը շատ են տարբերվում: «Ես սիրում եմ հայկական խոհանոց և հաճախ եմ այցելում այստեղ, համտեսում ձեր ավանդական ուտեստները: Դուք հրաշալի խոհարարներ ունեք, որոնք հրաշքներ են ստեղծում»,- շեշտեց Կոբիաշվիլին:

Միջոցառմանը ներկա էր նաև Հայաստանում Վրաստանի արտակարգ և լիազոր  դեսպան Գեորգի Շարվաշիձեն: Նա հատուկ շնորհակալություն հայտնեց միջոցառման կազմակերպիչներին՝ նշելով, որ փառատոնը խորհրդանշում է երկու երկրների բարեկամությունը, եղբայրությունը, մշակութային երկխոսությունը:

Փառատոնին ամփոփվեցին նաև միջոցառման շրջանակում կազմակերպված հայ և վրացի խոհարարների միջև մրցույթի արդյունքները: Հայաստանի խոհարարները պատրաստել էին Տավուշին բնորոշ, վրացական կողմը՝ իր նախընտրած կերակրատեսակները։ Առանձնացվել էին տոլման ու խինկալին:

Փառատոնն անցկացվեց «Հայ խոհարարական ավանդույթների զարգացման և պահպանման» հասարակական կազմակերպության, ՀՀ էկոնոմիկայի նախարարության զբոսաշրջության կոմիտեի,  Տուրիզմի hայկական ֆեդերացիայի նախաձեռնությամբ:

 

Հայաստան-ԱՄՆ գործընկերությունն օրեցօր ավելի է ամրապնդվում․ Սամանթա Փաուերն ամփոփել է Հայաստան կատարած այցը

Քաղաքականություն

Հայաստան-ԱՄՆ գործընկերությունն օրեցօր ավելի է ամրապնդվում․ Սամանթա Փաուերն ամփոփել է Հայաստան կատարած այցը

Նիկոլ Փաշինյանը ցավակցական հեռագիր է հղել  Վիետնամի  վարչապետին

Ասիա

Նիկոլ Փաշինյանը ցավակցական հեռագիր է հղել Վիետնամի վարչապետին

Երևանում խոշոր ավտովթար է տեղի ունեցել. մահացել է 3 մարդ, ևս մեկի վիճակը գնահատվում է ծայրահեղ ծանր

Իրավունք

Երևանում խոշոր ավտովթար է տեղի ունեցել. մահացել է 3 մարդ, ևս մեկի վիճակը գնահատվում է ծայրահեղ ծանր

Գյումրիի տներից մեկում մի քանի ամսվա վաղեմությամբ մահացած կնոջ դի է հայտնաբերվել․ մեկ անձ ձերբակալվել է

Իրավունք

Գյումրիի տներից մեկում մի քանի ամսվա վաղեմությամբ մահացած կնոջ դի է հայտնաբերվել․ մեկ անձ ձերբակալվել է

Հայաստանը վերահաստատում է Ադրբեջանի հետ սահմանին հրադադարի խախտման դեպքերի համատեղ հետաքննության մեխանիզմ ստեղծելու առաջարկը

Քաղաքականություն

Հայաստանը վերահաստատում է Ադրբեջանի հետ սահմանին հրադադարի խախտման դեպքերի համատեղ հետաքննության մեխանիզմ ստեղծելու առաջարկը

Շրջադարձային որոշումներ՝ Հայաստանի եվրաինտեգրման տեսանկյունից․ Արման Եղոյանը՝ ԵՄ արտաքին հարաբերությունների խորհրդի որոշումների մասին

Քաղաքականություն

Շրջադարձային որոշումներ՝ Հայաստանի եվրաինտեգրման տեսանկյունից․ Արման Եղոյանը՝ ԵՄ արտաքին հարաբերությունների խորհրդի որոշումների մասին

Վրաստանում գրանցված 6-7 բալ ուժգնությամբ երկրաշարժը զգացվել է նաև Հայաստանի մարզերում

Վրաստան

Վրաստանում գրանցված 6-7 բալ ուժգնությամբ երկրաշարժը զգացվել է նաև Հայաստանի մարզերում

Նիկոլ Փաշինյանը շնորհավորական ուղերձ է հղել Լիտվայի վարչապետին

Եվրոպա

Նիկոլ Փաշինյանը շնորհավորական ուղերձ է հղել Լիտվայի վարչապետին

Ժողովրդավարական ուժերի հարթակը ԵՄ-ին ՀՀ անդամակցության հանրաքվեի վերաբերյալ համապետական ստորագրահավաք կանցկացնի

Քաղաքականություն

Ժողովրդավարական ուժերի հարթակը ԵՄ-ին ՀՀ անդամակցության հանրաքվեի վերաբերյալ համապետական ստորագրահավաք կանցկացնի

Հայաստանը ողջունում է ԵՄ-ի կողմից կայացրած պատմական որոշումները. Արարատ Միրզոյան

Քաղաքականություն

Հայաստանը ողջունում է ԵՄ-ի կողմից կայացրած պատմական որոշումները. Արարատ Միրզոյան

Խաղաղության եվրոպական հիմնադրամից Հայաստանին 10 մլն եվրո տրամադրելու որոշումը պաշտոնապես հաստատվեց

Քաղաքականություն

Խաղաղության եվրոպական հիմնադրամից Հայաստանին 10 մլն եվրո տրամադրելու որոշումը պաշտոնապես հաստատվեց

AREMNPRESS

Հայաստան, Երևան, 0002, Մարտիրոս Սարյան 22

+374 11 539818
contact@armenpress.am
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում