Ժողովրդավարության հայրենիքը ԵՄ-ն է, ՀՀ էությունը ժողովրդավարությունն է․ Հովհաննես Ազոյան
2 րոպեի ընթերցում
![Ժողովրդավարության հայրենիքը ԵՄ-ն է, ՀՀ էությունը ժողովրդավարությունն է․ Հովհաննես Ազոյան](http://armenpress.am/resized/480/storage/images/articles/2024/06/21/A3iPnCKJEMJMv5P1MzvmphLQ34s1fElpHiXo6vOj.webp)
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Դերասան, Հայաստանի եվրոպական կուսակցության անդամ Հովհաննես Ազոյանը կողմ է Եվրամիությանը Հայաստանի անդամակցությանը:
«Արմենպրես»-ի փոխանցմամբ՝ Ազոյանն իր դիրքորոշումը հայտնեց «Հայաստանի՝ Եվրոպական միությանն անդամակցության հայտ ներկայացնելու հարցով հանրաքվե անցկացնելու առաջարկի շուրջ» թեմայով խորհրդարանական լսումների ժամանակ ունեցած ելույթում:
«Մենք ցանկանում ենք հանրաքվեի միջոցով դիմել հանրությանը և ստանալ Հայաստանի կողմից ԵՄ-ին անդամակցության հայտ ներկայացնելուն հանրության համաձայնությունը: Բոլորս գիտենք, որ ԵՄ-ն ժողովրդավարության հայրենիքն է: Հետևաբար, հանրաքվեի ժամանակ այո կամ ոչ ասելու համար, ըստ իս, յուրաքանչյուր քաղաքացի պետք է իրեն ուղղի հետևյալ հարցը՝ ի՞նչ է ժողովրդավարությունն իր համար: Որպես շարքային քաղաքացի՝ այս հարցին կոնկրետ ես կպատասխանեմ այսպես՝ ժողովրդավարությունն ինձ համար իրավունքն է, պարտավորությունն ու ապահովությունն է: Ահա այս 3 կարևոր նախապայմանն է ինձ համար, որ կստեղծեն կենսունակ այնպիսի միջավայր, որտեղ ես կզբաղվեմ ստեղծարար աշխատանքով և կունենամ էսթետիկ կենցաղ ու կապրեմ երջանիկ»,–ասաց Ազոյանը:
Ըստ նրա՝ ՀՀ-ն արդեն իսկ դե յուրե ժողովրդավարական երկիր է, սակայն դե ֆակտո՝ ոչ: Նա ընդգծեց, որ ժողովրդավարությունը, սակայն, թերի չի լինում:
«30 տարուց ավելի Հայաստանում ժողովրդավարությունը եղել է թերի, կեղծ, անկատար՝ ըստ քաղաքական իրավիճակի ու ճաշակի: Հայաստանում միշտ կիսատ են մնացել մեր պատկերացումներն իրական ժողովրդավարության մասին, և մենք երբեք չենք ճաշակել այդ քաղաքակրթական բարիքը, միշտ վախեցել, հապաղել ու դանդաղել ենք կառուցել իրական ժողովրդավարություն»,–ասաց նա՝ կարծիք հայտնելով, որ միայն հանրաքվեի դրական արդյունքը կստիպի շարժվել ավելի արագ ու վճռական:
Վերջում Ազոյանը շեշտեց՝ ժողովրդավարության հայրենիքը Եվրոպական միությունն է, ՀՀ էությունը ժողովրդավարությունն է, հասցեն՝ ԵՄ-ն, արձանագրումը՝ հանրաքվեն: