Յասմինա Ռեզայի «Սպանդի աստվածը» ներկայացումը համալրել է Ստանիսլավսկու անվան թատրոնի խաղացանկը

ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Կոնստանտին Ստանիսլավսկու անվան ռուսական դրամատիկական թատրոնի խաղացանկը հարստացել է ևս մեկ հետաքրքիր ներկայացմամբ: Հունիսի 19-ին թատրոնում կայացել է ֆրանսիացի դրամատուրգ Յասմինա Ռեզայի «Սպանդի աստվածը» տրագիկոմեդիայի առաջնախաղը:

«Արմենպրես»-ի հաղորդմամբ՝ ներկայացման բեմադրիչն Արսեն Խաչատրյանն է:

Սովորական ընտանեկան հանդիպումը վերածվում է հոգեբանական լարված պայքարի. ուշադրության կենտրոնում այն հարցն է, թե ինչ մութ կողմեր կան քաղաքավարության և ընդունված նորմերի դիմակի հետևում։ 

Ներկայացման դերակատարներն են Մանվել Խաչատրյանը, Լիլիա Մուկուչյանը, Հայարփի Զուռնաչյանը, Մինաս Ասրյանը: 

Ներկայացումը նախատեսված է 16 տարեկանից բարձր անձանց համար: Պիեսի գործողություններին հանդիսատեսը հետևում է բեմից՝ դերասանների հետ նույն հարթության վրա: