«Կին-Woman-Das Mädchen-La Femme» համերգով կներկայացվի կինն իր տարբեր դրսևորումներով

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: «Կանտատա» մշակութային հասարակական կազմակերպությունը կներկայացնի նոր նախագիծ՝ նվիրված կնոջը։ Հունիսի 25-ին «Առնո Բաբաջանյան» համերգասրահում տեղի կունենա բացառիկ համերգ-ներկայացում, որը կրում է «Կին-Woman-Das Mädchen-La Femme» խորագիրը:

Ըստ Ռաֆայել Պատայի «Աստվածուհի» գրքի՝ կինը մայր է, մարտիկ, կույս և սիրուհի։ Միայն այս չորսի միասնությունն է կնոջը դարձնում լիարժեք երջանիկ և տալիս կանացի ուժ։

«Արմենպրես»-ի հաղորդմամբ՝ համերգին ելույթ կունենա մեցցո-սոպրանո Վարսենիկ Ավանյանը, «Կանտատա» անսամբլը՝ դիրիժոր Հարություն Արզումանյանի ղեկավարությամբ։ Ռեժիսորն Օլգա Գուսևան է: Ծրագրում ընդգրկված են  Յ.Ս. Բախի, Ժ. Ֆ. Ռամոյի, Ժ. Բիզեի, Բ. Բրիտտենի և Ա. Պիացոլլայի ստեղծագործություններից։

Համերգը բաղկացած է մեկը մյուսին լրացնող չորս մասից. յուրաքանչյուր մաս նվիրված է կնոջ մեկ կերպարի։ Կնոջ ամեն մի կերպարի համար ընտրված են մեկ դարաշրջանի վոկալ-կամերային ստեղծագործություններ։

Նախագծի հիմնական նպատակն է երաժշտության միջոցով ներկայացնել կնոջ կերպարն իր չորս մարմնացումներով։ 

Համերգ-ներկայացման հանդիսատեսը կտեսնի կնոջն այդ չորս կերպարի մեջ․ կին, որն  իրեն զգում է ուժեղ՝ չկորցնելով իր կանացիությունը։ «Կանտատա» մշակութային հասարակական կազմակերպությունը, հավատարիմ մնալով իր հիմնական գաղափարախոսությանը, այս նախագծի շրջանակներում ևս հանդիսատեսին կներկայացնի հազվադեպ կատարվող ստեղծագործություններ։ 

Նախագիծն իրականացվում է ՀՀ ԿԳՄՍ նախարարության աջակցությամբ և «Առնո Բաբաջանյան» համերգասրահի գործընկերությամբ։