Փաշինյանն իր ուղերձում հաստատում է Հայոց ցեղասպանության փաստն ու դրա մասշտաբները․ Գրեգ Սարգսյանն արձագանքել է Լեմկինի ինստիտուտի հայտարարությանը

ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ։ Զորյան ինստիտուտի տնօրեն Գրեգ Սարգսյանն անդրադարձել է Լեմկինի ինստիտուտի հայտարարությանը, որով վերջինս Հայաստանի վարչապետ Նիկոլ Փաշինյանին մեղադրել էր իբր Հայոց ցեղասպանությունը ժխտելու մեջ։

«Արմենպրես»-ի փոխանցմամբ՝ իր հոդվածում Գրեգ Սարգսյանը իր զարմանքն է արտահայտել, որ Հայոց ցեղասպանության 109-րդ տարելիցի կապակցությամբ վարչապետ Նիկոլ Փաշինյանի ուղերձը Լեմկինի ինստիտուտը համարել է վարչապետի կողմից Ցեղասպանության ժխտում։

«Ես գտնում եմ, որ Լեմկինի ինստիտուտի հայտարարությունը զարմանալի է, ոչ անհրաժեշտ և անպատասխանատու։ Այն կարդալն ինձ մղեց հասկանալու դրա շարժառիթներն ու հնչող մեղադրանքների հիմքերը»,- գրում է Սարգսյանը։

Նա շեշտում է, որ իր ուղերձի հենց առաջին պարբերությունում վարչապետ Նիկոլ Փաշինյանը հստակ ընդգծում է օրվա խորհուրդը և հաստատում է Հայոց ցեղասպանության փաստը։

Սարգսյանը մեջբերել է վարչապետի ուղերձի առաջին պարբերությունը․ «Այսօր մենք ոգեկոչում ենք Հայոց ցեղասպանության, Մեծ եղեռնի 1.5 միլիոն զոհերի հիշատակը, ովքեր 1915 թվականից Օսմանյան կայսրությունում սրի քաշվեցին հայ լինելու համար»:

Նա ընդգծել է, որ այս հատվածում, որը, կարծես, ակամա դուրս է մնացել Լեմկինի ինստիտուտի վերլուծությունից, Նիկոլ Փաշինյանը չի փորձում ժխտել կամ նվազեցնել Հայոց ցեղասպանության մասշտաբները։ Գրեգ Սարգսյանը շեշտում է, որ այս մեկ նախադասությամբ ՀՀ վարչապետն ընդգծում է Ցեղասպանության ճանաչման 4 անուղղակի հաստատումները․

«Առաջին հերթին նա հավասարություն է դնում Հայոց ցեղասպանություն և Մեծ եղեռն տերմինների միջև՝ թույլ տալով դրանց փոխանակելիությունը։ Երկրորդ․ հաստատելով 1․5 միլիոն հայերի կորուստը՝ նա Ցեղասպանության մասշտաբներն ու դաժանությունը ժխտելու որևէ փորձ չի անում։ Երրորդ՝ նա ընդունում է, որ 1․5 միլիոն հայեր սրի են քաշվել Օսմանյան կայսրության ամբողջ տարածքում։ Չորրորդ՝ նշվում է, որ 1․5 միլիոն հայերը սրի են քաշվել պարզապես հայ լինելու համար՝ ելնելով ազգային, էթնիկ և կրոնական նկատառումներից»,- իր հոդվածում գրել է Զորյան ինստիտուտի տնօրենը։

Նա հարց է բարձրացնում, թե ինչու Լեմկինի ինստիտուտը իր վերլուծության մեջ չի ներառել վարչապետի ուղերձի վերոնշյալ հատվածը, որը հստակ ճանաչում է Հայոց ցեղասպանությունը, դրա մասշտաբները և դրա հիմքում ընկած պատճառները։

Սարգսյանը նաև նշել է, որ հոդվածում արտահայտել է բացառապես իր կարծիքը և որ այն Զորյան ինստիտուտի պաշտոնական տեսակետը չէ։

Գրեգ Սարգսյանը նաև երախտագիտություն է հայտնել Լեմկինի ինստիտուտին ցեղասպանագիտության ուղղությամբ կատարած լուրջ և կարևոր աշխատանքի համար։