Գյումրու դրամատիկական թատրոնը «Երիտասարդություն. Թատրոն. Ֆեստ» միջազգային փառատոնին ներկայացել է «Շարքային Թռչնակ»-ով
3 րոպեի ընթերցում
![Գյումրու դրամատիկական թատրոնը «Երիտասարդություն. Թատրոն. Ֆեստ» միջազգային փառատոնին ներկայացել է «Շարքային Թռչնակ»-ով](http://armenpress.am/resized/480/static/news/b/2024/06/1138568.jpg)
ԳՅՈՒՄՐԻ, 2 ՀՈՒՆԻՍԻ, ԱՐՄԵՆՊՐԵՍ: Գյումրու Վարդան Աճեմյանի անվան պետական դրամատիկական թատրոնը Սանկտ Պետերբուրգում կայացած «Երիտասարդություն. Թատրոն. Ֆեստ» միջազգային փառատոնին ներկայացել է «Շարքային Թռչնակ» բեմադրությամբ։ Ինչպես տեղեկացնում է «Արմենպրես»-ը, XXV միջազգային թատերական փառատոնն անցկացվել է Ա.Ա.Բրյանցևի անվան պատանի հանդիսատեսի պետական թատրոնում՝ մայիսի 24-30-ը։ Փառատոնի ծրագիրը ներառել է 27 ներկայացում, որոնք պատրաստել էին Ռուսաստանի, Բելառուսի, Հայաստանի, Ղազախստանի, Բրազիլիայի, Իրանի, Իրաքի, Թունիսի և այլ երկրների թատրոնները։
Ամեն տարի փառատոնը համախմբում է ոչ միայն լավագույն ներկայացումներ ամբողջ աշխարհից, այլև ժամանակակից արվեստի գործիչների՝ ռեժիսորների, թատերագետների և պրոդյուսերների։ Ըստ փառատոնի կոնցեպտի՝ ներկայացումը պետք է հետաքրքիր լինի երիտասարդներին՝ օրիգինալ բովանդակությամբ և ռեժիսորական լուծումներով. այն պետք է արտացոլի ամենաժամանակակից թատերական միտումները։ Նախկինում այս փառատոնը կոչվել է «Ռադուգա»։
«Այս փառատոնին Գյումրու թատրոնը մասնակցում էր առաջին անգամ։ Մեզ համար մեծ պատիվ էր փառատոնի փակման օրը հանդես գալ. ներկայացրել ենք Ուիլյամ Ուորթոնի «Շարքային Թռչնակ»-ը հոգեբանական դրաման. ռեժիսոր՝ Տաթև Մելքոնյան։ Ներկայացումը շատ ջերմ ընդունելության արժանացավ, ինչի վառ ապացույցը եղավ այն, որ Գյումրու թատրոնը դարձավ փառատոնի պաշտոնական անդամ»,- «Արմենպրես»-ի հետ զրույցում նշեց թատրոնի գեղարվեստական ղեկավար Լյուդվիգ Հարությունյանն՝ ավելացնելով, որ փառատոնի շրջանակներում կան նաև համագործակցության նախնական պայմանավորվածություններ։ «Փառատոնի առանձնահատկությունը նաև այն է, որ շատ են տարբեր երկրների փառատոնների կազմակերպիչները, և Գյումրու թատրոնն արդեն իսկ երեք նմանատիպ փառատոնների մասնակցության պայմանավորվածություններ ձեռք է բերել։ Նշեմ, որ այսօր բավական բարդ է ռուս թատերագետների դրական արձագանքին արժանանալ, երբ ներկայացված են լավագույն ներկայացնումները, և շատ ուրախ եմ, որ Հայաստանն այս առումով իր խոսքն ասաց ու դրական արձագանքների արժանացավ»,- նշեց Լյուդվիգ Հարությունյանը՝ տեղեկացնելով, որ թատրոնը փառատոնին մասնակցել է ՀՀ կրթության, գիտության, մշակույթի և սպորտի նախարարության աջակցությամբ։
Փառատոնի ավարտին թատրոնն արժանացել է փառատոնի դիպլոմի ու արձանիկի․ 2018 թվականից մասնակիցներին շնորհվում է արձանիկ, որը հատուկ փառատոնի համար նախագծել է հայտնի քանդակագործ Վլադիմիր Գորևը։
ԱրմենուհիՄխոյան