ԱԳՆ-ի շենքի դիմաց իրավիճակը լարվեց․ ոստիկանությունը մի խումբ ցուցարարների բերման ենթարկեց
1 րոպեի ընթերցում
![ԱԳՆ-ի շենքի դիմաց իրավիճակը լարվեց․ ոստիկանությունը մի խումբ ցուցարարների բերման ենթարկեց](http://armenpress.am/resized/480/static/news/b/2024/05/1138459.jpg)
ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ։ Հայաստանի արտաքին գործերի նախարարության շենքի դիմաց, որտեղ ակցիա են իրականացնում «Տավուշը հանուն հայրենիքի» շարժման անդամները, իրավիճակը լարվեց։
Ինչպես հաղորդում է «Արմենպրես»-ը, բողոքի ակցիայի ղեկավարները պահանջում էին, որպեսզի ԱԳ նախարար Արարատ Միրզոյանը կամ նախարարությունից որևէ մեկը իջնի և հանդիպի իրենց հետ, հակառակ դեպքում սպառնում էին, որ իրենք են բարձրանալու ԱԳՆ շենք։
Ոստիկանությունը մի քանի անգամ ցուցարարներին հորդորեց զերծ մնալ հակաիրավական գործողություններից՝ զգուշացնելով, որ ԱԳՆ-ն հատուկ պահպանվող տարածք է, որտեղ գործում է հատուկ անցագրային ռեժիմ։
Որոշ ժամանակ անց ցուցարարներն առաջ շարժվեցին՝ փորձելով ճեղքել ԱԳՆ-ի դիմաց տեղակայված ոստիկանական պատը, ինչից հետո ոստիկանությունը գործողություններ սկսեց։
Ոստիկանությունը մի խումբ ցուցարարների բերման ենթարկեց։
ԱԳՆ-ի շենքի դիմաց իրավիճակը շարունակում է լարված մնալ։