Վարչապետը ցավակցություն հայտնեց հեղեղումների հետևանքով զոհվածների հարազատներին

ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ։ Վարչապետ Նիկոլ Փաշինյանը կառավարության նիստի մեկնարկից առաջ ցավակցություն հայտնեց Լոռու և Տավուշի մարզերում տեղի ունեցած հեղեղումների զոհերի հարազատներին, ընտանիքի անդամներին։

«Նախ ուզում եմ կառավարության և ժողովրդի անունից ցավակցություն հայտնել Լոռու և Տավուշի մարզերում տեղի ունեցած ջրհեղեղի զոհերի հարազատներին, ընտանիքի անդամներին»,- «Արմենպրես»-ի հաղորդմամբ՝ ասաց Փաշինյանը։

Օրակարգի հաստատումից հետո Տարածքային կառավարման և ենթակառուցվածքների նախարար, Լոռու ևՏավուշի մարզերում արտակարգ իրավիճակի կառավարման օպերատիվ շտաբի ղեկավար Գնել Սանոսյանը հանդես է գալիս աղետի գոտում իրավիճակի վերաբերյալ զեկույցով։

Մայիսի 26-ինհորդառատ անձրևների և Դեբեդ, Աղստև, Տաշիր գետերի վարարման հետևանքով Լոռու և Տավուշի մարզերում հեղեղումներ են առաջացել։ Հեղեղումների հետևանքով ջրալցվել են տներ, շենք-շինություններ, քանդվել ճանապարհներ։ Հեղեղումների հետևանքով կա 4 զոհ։ Կառավարությունն աղետի գոտի է հայտարարել հեղեղումներից տուժած բնակավայրերում և 300 միլիոն դրամ է հատկացրել հրատապ խնդիրների լուծման համար։