Կառավարության օրակարգում երբեք չի եղել Հայոց ցեղասպանության զոհերի ցուցակ կազմելու հարց

ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Հայաստանի կառավարության օրակարգում երբեք չի եղել Հայոց ցեղասպանության զոհերի ցուցակ կազմելու հարց:

«Արմենպրես»-ի հաղորդմամբ՝ այս մասին ասուլիսում հայտնեց վարչապետ Նիկոլ Փաշինյանը:

«Ցեղասպանության զոհերի ցուցակի վերաբերյալ արդեն պարզաբանում հնչել է, և այդպիսի օրակարգ չի եղել երբեք: Մեր կառավարության օրակարգում, իմ օրակարգում նման հարց չի եղել երբեք»,–ասաց վարչապետը:

Ավելի վաղ ԱԺ պաշտպանության հանձնաժողովի նախագահ Անդրանիկ Քոչարյանը պարզաբանել էր, որ Հայոց ցեղասպանության 1.5 մլն զոհերի ցուցակներ կազմելու թեմայով որևիցե քաղաքական որոշում չկա, Ազգային ժողովի իշխող խմբակցությունը նման քննարկում չի ունեցել, իսկ այդ առումով հնչեցված միտքն իր անձնական կարծիքն է ընդամենը: