1 րոպեի ընթերցում
ԵՐԵՎԱՆ, 2 ՄԱՅԻՍԻ, ԱՐՄԵՆՊՐԵՍ։ Այս պահին Հայաստանի Հանրապետությունում ազատությունից զրկված անձանց 50 տոկոսից ավելին կալանավորված անձինք են։
«Արմենպրես»-ի հաղորդմամբ՝ Ազգային ժողովում այս մասին ասաց Մարդու իրավունքների պաշտպան Անահիտ Մանասյանը՝ ներկայացնելով 2023 թվականի ընթացքում Հայաստանի Հանրապետության մարդու իրավունքների պաշտպանի գործունեության, մարդու իրավունքների եւ ազատությունների պաշտպանության վիճակի մասին տարեկան հաղորդումը եւ Հայաստանի Հանրապետության մարդու իրավունքների պաշտպանի՝ որպես կանխարգելման ազգային մեխանիզմի 2023 թվականի գործունեության վերաբերյալ տարեկան զեկույցը։
«Դատարան ներկայացրած 2802 միջնորդություններից նախորդ տարի բավարարվել է ավելի քան 82 տոկոսը։ Ինձ համար մտահոգիչ թիվ է այն հանգամանքը, որ այս պահին Հայաստանի Հանրապետությունում ազատությունից զրկված անձանց 50 տոկոսից ավելին կալանավորված անձինք են, իսկ այդ վիճակագրությունը միջազգային չափանիշների տեսանկյունից առնվազն խնդրահարույց է։ Կարծում եմ, որ պետությունը այստեղ պետք է բավարար քայլեր ձեռնարկի խնդիրը հասցեագրելու և հաղթահարելու ուղղությամբ՝ յուրաքանչյուրն իր գործառույթների և լիազորությունների շրջանակներում»,- ընդգծեց Պաշտպանը։