4 րոպեի ընթերցում
ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Հայաստանի վիճակագրական կոմիտեն հրապարակել է 2024 թվականի մարտին երկրի սոցիալ-տնտեսական վիճակը բնութագրող՝ ընթացիկ-օպերատիվ ամփոփմամբ ստացված նախնական հիմնական մակրոտնտեսական ցուցանիշները:
«Արմենպրես»-ի հաղորդմամբ՝ ապրիլի 25-ի դրությամբ ներկայացված ցուցանիշներից հետևում է, որ մարտին՝ նախորդ տարվա նույն ամսվա համեմատ Հայաստանում տնտեսական ակտիվության ցուցանիշն աճել է 15.3 տոկոսով: Այս տարվա փետրվարի համեմատ աճը կազմել է 10.4 տոկոս: Ընդհանրապես, 2024 թվականի հունվար-մարտ ամիսներին նշված ցուցանիշը 14.3 տոկոսով գերազանցել է նախորդ տարվա նույն ժամանակահատվածի տվյալը:
Արդյունաբերական արտադրանքի ծավալը 2024-ի մարտին 33.5 տոկոսով բարձր է եղել նախորդ տարվա նույն ամսվա ցուցանիշից՝ կազմելով 262 մլրդ 483.7 մլն դրամ: Ընդ որում, այս տարվա փետրվարի համեմատ գրանցվել է 0.2 տոկոս աճ: Հունվար-մարտին արդյունաբերական արտադրանքի ծավալը կազմել է 723 մլրդ 685 մլն դրամ: Նախորդ տարվա նույն ժամանակահատվածի համեմատ գրանցվել է 30.4 տոկոսի աճ:
Մարտին գյուղատնտեսության համախառն արտադրանքի ծավալների վերաբերյալ տեղեկություններ ներկայացված չեն: Փոխարենը նշվում է, որ հունվար-մարտ ամիսներին այն կազմել է 87 մլրդ 274.1 մլն դրամ՝ նախորդ տարվա նույն ժամանակահատվածի համեմատ աճելով 3.7 տոկոսով:
Շինարարության ծավալը մարտին կազմել է 30 մլրդ 638.2 մլն դրամ՝ անցյալ տարվա նույն ամսվա համեմատ աճելով 13.1 տոկոսով: Այս տարվա փետրվարի համեմատ ծավալներն աճել են 29.4 տոկոսով: 2024-ի հունվար-փետրվարին կատարվել է 72 մլրդ 195.4 մլն դրամի շինարարական աշխատանք: Դա 11.7 տոկոսով բարձր է նախորդ տարվա նույն ժամանակահատվածի ցուցանիշից:
2024 թվականի մարտին ներքին առևտրի շրջանառությունը կազմել է 489 մլրդ 92.6 մլն դրամ, ինչը 30.4 տոկոսով գերազանցում է անցյալ տարվա նույն ամսվա ցուցանիշը: Իսկ այս տարվա փետրվարի համեմատ աճը կազմել է 20.1 տոկոս: 2024 թվականի հունվար-մարտ ամիսներին ներքին առևտրի շրջանառությունը կազմել է 1 տրլն 238 մլրդ 169.2 մլն դրամ: Նախորդ տարվա նույն ժամանակահատվածի ցուցանիշը գերազանցվել է 26.5 տոկոսով:
2024-ի մարտին մատուցված ծառայությունների ծավալն (առանց առևտրի) կազմել է 272 մլրդ 479.5 մլն դրամ՝ 4.7 տոկոսով գերազանցելով նախորդ տարվա նույն ամսվա ցուցանիշը: Այս տարվա փետրվարի համեմատ աճը կազմել է 15.1 տոկոս: Հունվար-մարտ ամիսներին մատուցվել է 745 մլրդ 590.5 մլն դրամի ծառայություններ: Նախորդ տարվա նույն ժամանակահատվածի ցուցանիշը գերազանցվել է 5 տոկոսով:
Այս տարվա մարտ ամսին և հունվար-մարտ ամիսներին սպառողական գների ինդեքսի փոփոխության վերաբերյալ տվյալներ ներկայացված չեն: Սակայն, նշվում է, որ մարտին՝ անցյալ տարվա նույն ամսվա համեմատ, այն նվազել է 1.2 տոկոսով: Այս տարվա փետրվարի համեմատ գնանկումը 0.2 տոկոս է: Իսկ հունվար-մարտ ամիսներին այն 1.2 տոկոսով ցածր է եղել 2023-ի նույն ժամանակահատվածի ցուցանիշից:
Ներկայացված չէ նաև այս տարվա մարտին և հունվար-մարտ ամիսներին արդյունաբերական արտադրանքի գների ինդեքսը: 2024-ի մարտին, անցյալ տարվա նույն ամսվա համեմատ, ցուցանիշը մնացել է անփոփոխ: Այս տարվա փետրվարի համեմատ նվազել է 0.1 տոկոսով: Հունվար-մարտ ամիսներին այն 0.3 տոկոսով ցածր է եղել նախորդ տարվա նույն ժամանակահատվածի ցուցանիշից:
2024-ի մարտին Հայաստանում արտադրվել է 789.1 մլն կՎտ/ժ էլեկտրաէներգիա, ինչը 6.5 տոկոսով գերազանցում է նախորդ տարվա նույն ամսվա ցուցանիշը: Այս տարվա փետրվարի համեմատ աճը կազմել է 1.3 տոկոս: Հունվար-մարտ ամիսներին երկրում արտադրվել է 2 մլրդ 383.5 մլն կՎտ/ժ էլեկտրաէներգիա. դա 1.4 տոկոսով քիչ է նախորդ տարվա նույն ժամանակահատվածի ցուցանիշից: