Քաղաքականություն

Շուրջ 2600 եզդի կանայք դեռ գերության մեջ են, ցեղասպանությունը շարունակվում է. Ռուստամ Բաքոյան

3 րոպեի ընթերցում

Շուրջ 2600 եզդի կանայք դեռ գերության մեջ են, ցեղասպանությունը շարունակվում է. Ռուստամ Բաքոյան

ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: «Իսլամական պետություն» ահաբեկչական խմբավորման կողմից 2014 թվականի Սինջարի եզդիների ցեղասպանությունը դեռ շարունակվում է. 2600-ից ավելի եզդի կանայք դեռ գերության մեջ են:

«Արմենպրես»-ի փոխանցմամբ՝ ԱԺ-ում լրագրողների հետ զրույցում այս մասին ասաց «Քաղաքացիական պայմանագիր» խմբակցության՝ ազգությամբ եզդի պատգամավոր Ռուստամ Բաքոյանը:

«Ցեղասպանությունը մինչև այսօր շարունակվում է: Շուրջ 2600-ից ավելի իմ քույրեր դեռ գտնվում են գերության մեջ, նրանց ճակատագրերն անհայտ է: Մեզ հաջողվել է մի մասին գումարով վերադարձնել, ցավոք, չի հաջողվել շատերին վերադարձնել: Մինչև այսօր հարյուր հազարավոր եզդիներ ապրում են ճամբարներում, գտնվում են ծայրահեղ վատ վիճակում՝ առողջապահական, կրթության խնդիրներ և այլն»,-ասաց պատգամավորը՝ հավելելով, որ միջազգային հանրության ուշադրության անհրաժեշտություն կա:

Բաքոյանը համոզված է, որ Հայաստանում Սինջարի եզդիների ցեղասպանության զոհերի հիշատակի օր սահմանելու իր նախաձեռնությունն այս առումով ևս օգնելու է, որ 2014 թվականից շարունակվող ցեղասպանությունը կանգնի:

Նա շնորհակալություն հայտնեց հայ ժողովրդին, ՀՀ կառավարությանը՝ ի դեմս վարչապետին, օրենսդիր մարմնին՝ ի դեմս ԱԺ նախագահի, նաև ընդդիմադիր գործընկերներին, որոնք մասնակցել և կողմ են քվեարկել իր առաջարկած նախագծին:

Հայաստանի ազգային ժողովը ապրիլի 16-ին հրավիրված արտահերթ նիստում առաջին ընթերցմամբ ընդունեց օգոստոսի 3-ը Սինջարի եզդիների ցեղասպանության զոհերի հիշատակի օր սահմանելու նախագիծը: Երկրորդ ընթերցմամբ քննարկումը ևս նախատեսվում է ապրիլի 16-ին:

2014 թվականի օգոստոսի 3-ին «Իսլամական պետություն» ահաբեկչական խմբավորման կողմիցտեղի են ունեցել հարձակումներ եզդիներով բնակեցված Իրաքի Սինջար քաղաքի վրա, որտեղ սպանվել են ավելի քան երեք հազար մարդ: Սովի, ծարավի և անտանելի շոգի հետևանքով մահացել է լեռներում ապաստան գտած մոտ հազար մարդ, ավելի քան 200 հազար եզդիներ դարձել են փախստական, առևանգվել են 13-ից 56 տարեկան շուրջ 5000 կանայք և աղջիկներ: Վերջիններիս կյանքի պահպանման նախապայման է եղել իսլամի ընդունումը և ամուսնությունը ջիհադիստների հետ:

AREMNPRESS

Հայաստան, Երևան, 0002, Մարտիրոս Սարյան 22

+374 11 539818

contact@armenpress.am

fbtelegramyoutubexinstagramtiktokspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում