Կառավարությունը նախատեսում է կարգավորել դեղերի գրանցման և կլինիկական փորձարկումների ոլորտը
2 րոպեի ընթերցում
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ։ Կառավարությունը նախատեսում է կարգավորել դեղերի գրանցման, կլինիկական փորձարկումների ոլորտը և ներդաշնակեցնել դեղերի ներմուծման գործընթացները: Ինչպես տեղեկացնում է «Արմենպրես»-ը, Ազգային ժողովում ««Դեղերի մասին» և կից օրենքներում առաջարկվող լրացումները և փոփոխությունների նախագիծը» ներկայացրեց Առողջապահության նախարար Անահիտ Ավանեսյանը։
«2016 թվականին ընդունված «Դեղերի մասին» օրենքի կիրարկման ընթացքում բացահայտվել են մի շարք բացթողումներ, որոնք խոչընդոտում են ոլորտի լիարժեք կարգավորմանը: Որոշակի խնդիրներ են արձանագրվել նաեւ ՀՀ առողջապահական եւ աշխատանքի տեսչական մարմնի իրավակիրառ պրակտիկայում, այդ թվում՝ փորձաքննությունների իրականացման մասով»,- ասաց Ավանեսյանը։
Նախարարի դիտարկմամբ՝ օրենքը չի նախատեսում դեղերի շրջանառության պետական կարգավորման ոլորտում փորձաքննություններ եւ մասնագիտական դիտարկումներ իրականացնող կազմակերպության սահմանում, ինչը մի շարք խնդիրներ է առաջացրել: Կառավարության որոշումները փոփոխելու համար անհրաժեշտ են լիազորող նորմեր:
«Օրենքի էական թերություններից է նաև այն, որ նախատեսվում է զուգահեռ ներմուծման թույլտվության և դրա տրամադրման մերժման համակարգ՝ չհստակեցնելով կապը ներմուծման հավաստագրման գործընթացների եւ ներմուծման մերժման հիմքերի հետ»,- նշեց Ավանեսյանը՝ հավելելով, որ փաթեթը կազմելիս հաշվի առնվել ներմուծող ընկերությունների առաջարկները:
