«Մատենադարան․ լուսանկարչական գանձարանի հայտնությունը» խորագրով բացառիկ ցուցահանդեսը ներկայացվել է հանրությանը
2 րոպեի ընթերցում
ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Մաշտոցյան Մատենադարանի թանգարանային մասում բացվել է «Մատենադարան․ լուսանկարչական գանձարանի հայտնությունը» խորագրով բացառիկ ցուցահանդեսը։
Ինչպես«Արմենպրես»-ին տեղեկացրին ՀՀ կրթության, գիտության, մշակույթի և սպորտի նախարարությունից,բացման պաշտոնական արարողությանը ներկա են եղել ԿԳՄՍ նախարարի տեղակալներ Ալֆրեդ Քոչարյանը և Դանիել Դանիելյանը։
Նախարարի տեղակալ Ալֆրեդ Քոչարյանը շնորհավորել է ցուցահանդեսի բացման կապակցությամբ՝ ընդգծելով. «Հատկապես ուրախալի է այն հանգամանքը, որ միջոցառումը կայանում է միջթանգարանային համագործակցությամբ։ Նախարարությունը մշտապես պատրաստակամ է աջակցել ոլորտի առաջխաղացմանը նպաստող յուրաքանչյուր գաղափարի»,-նշել է նա:
Լուսանկարները Մատենադարանի տարբեր հավաքածուներից հայտնաբերված այնպիսի նմուշներ են, որոնք պատմական, աղբյուրագիտական, արվեստաբանական և ազգագրական տեսանկյունից առանձնահատուկ կարևորություն ունեն:
«Առաջին անգամ մեր լուսանկարչական հավաքածուները արժանացել են նման գիտական մոտեցմամբ մեկտեղման։ Ուրախ եմ, որ առիթ ունենք Մատենադարանի բովանդակությունը հագեցնելու նաև այս ցուցադրությամբ»,-ասել է Մատենադարանի տնօրեն Արայիկ Խզմալյանը։
Լուսանկարներում արտացոլված են ինչպես Արևելյան, այնպես էլ Արևմտյան Հայաստանի պատմամշակութային կոթողները, կյանքն ու կենցաղը, անվանի հայերի դիմանկարներ, ազգագրական նյութեր և այլն։
Ժամանակակից տեխնոլոգիաների շնորհիվ լուսանկարները նոր շունչ ու կենդանություն են ստացել։