Հայաստանի կառավարությունն այս տարի սպասում է առնվազն 7 տոկոս տնտեսական աճ

ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի կառավարությունը 2023 թվականին սպասում է առնվազն 7 տոկոս տնտեսական աճ, գնաճի միջավայրը կայուն է:

«Արմենպրես»-ի փոխանցմամբ՝ այս մասին ասաց Հայաստանի վարչապետ Նիկոլ Փաշինյանը Ազգային ժողովի հանձնաժողովների համատեղ նիստում՝ 2024 թվականի պետական բյուջեի մասին օրենքի նախագծի նախնական քննարկումներում:

«Մեր կարևորագույն ձեռքումներից մեկը սպառնալիքների և անվտանգային մարտահրավերների միջավայրում մեր մակրոտնտեսական կայունությունն է, որը մենք կարողացանք պահպանել և՛ պատերազմի, և՛ ներքաղաքական անկայունությունների, և՛ կորոնավիրուսի համավարակի ընթացքում: Հայաստանը երկրորդ տարին անընդմեջ շարունակում է մնալ բարձր տնտեսական աճի միջավայրում: Մենք այս տարի սպասում ենք առնվազն 7 տոկոս տնտեսական աճ»,-ասաց Փաշինյանը:

Վարչապետի խոսքով՝ գնաճի միջավայրը կայուն է: Առաջին 9 ամիսների արդյունքներով գնաճի ցուցանիշը 2.8 տոկոս է: 2023-ի սեպտեմբերին արձանագրվել է Հայաստանում գրանցված աշխատատեղերի նոր ռեկորդ: Սեպտեմբերին Հայաստանում գրանցված աշխատատեղերի թիվը 726 հազար 56 է եղել, որը 2018 թ․ մայիսի համեմատությամբ ավել է 178 հազար 67-ով:

«Սա նշանակում է, որ մեր կառավարությունն իր գործունեության ընթացքում Հայաստանում ստեղծել է 178 հազար աշխատատեղ»,-ասաց Փաշինյանը:

Վարչապետը մակրոտնտեսական կայունությունը բոլոր մարտահրավերները, սպառնալիքները կառավարելու, նաև հնարավորություններն օգտագործելու ամենակարևոր գործիքն ու ցուցանիշն է համարում: «Ի հեճուկս բոլոր մարտահրավերների՝ մեզ հաջողվել է մակրոտնտեսական կայունություն ապահովել, այդ թվում՝ Հայաստանում կոռուպցիայի դեմ սկզբունքային և համակարգված պայքար տանելու շնորհիվ»,-նշեց Փաշինյանը:

Նա մակրոտնտեսական կայունության համար ամենամեծ սպառնալիքներից մեկը համարում է կոռուպցիայի հնարավոր վերաակտիվացումը: Վարչապետը շեշտեց՝ կառավարությունն իր սկզբունքային պայքարը պետք է խորացնի կոռուպցիայի դեմ: