Վրաստանը պատրաստ է աշխատել Հայաստանի և Ադրբեջանի հետ՝ հանուն Հարավային Կովկասում երկարաժամկետ խաղաղության․ Ղարիբաշվիլի
1 րոպեի ընթերցում
![Վրաստանը պատրաստ է աշխատել Հայաստանի և Ադրբեջանի հետ՝ հանուն Հարավային Կովկասում երկարաժամկետ խաղաղության․ Ղարիբաշվիլի](http://armenpress.am/resized/480/static/news/b/2023/10/1122878.jpg)
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Վրաստանը պատրաստ է աշխատել Հայաստանի և Ադրբեջանի հետ Հարավային Կովկասում երկարաժամկետ խաղաղության հասնելու համար։
Ինչպես հաղորդում է«Արմենպրես»-ը, վկայակոչելով Վրաստանի վարչապետի պաշտոնական կայքը, այդ մասին Մետաքսի ճանապարհի համաժողովի ժամանակ ունեցած ելույթում հայտարարել է Վրաստանի վարչապետ Իրակլի Ղարիբաշվիլին։
«Մենք պատրաստ ենք աշխատել մեր հարևանների և բարեկամների՝ Հայաստանի և Ադրբեջանի հետ, որպեսզի վերջնականապես երկարաժամկետ խաղաղություն հաստատվի Հարավային Կովկասում: Ավելորդ է ասել, որ մշտական խաղաղությունը օգուտ կբերի մեր բոլոր երկրներին, ավելի լայն տարածաշրջանին և արժանի բարգավաճում կբերի մեր ժողովուրդներին», - ասել է Ղարիբաշվիլին։
Նա նշել է, որ ուրախ է Թբիլիսիում հյուրընկալել Հայաստանի վարչապետ Նիկոլ Փաշինյանին և Ադրբեջանի վարչապետ Ալի Ասադովին, որոնք մասնակցել են Մետաքսի ճանապարհի համաժողովին։
Նախկինում Ղարիբաշվիլին բազմիցս առաջարկել է Թբիլիսին՝ որպես Հայաստանի և Ադրբեջանի միջև հարաբերությունների կարգավորման բանակցությունների հարթակ: