Լեռնային Ղարաբաղի հայերի դեմ Ադրբեջանի ռազմական ագրեսիան անընդունելի է․ Բունդեսթագի արտաքին հարաբերությունների հանձնաժողովի նախագահ

ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ։ Ադրբեջանը Լեռնային Ղարաբաղի հայերի դեմ իր ռազմական ագրեսիայով վտանգի տակ է դնում ամբողջ տարածաշրջանի կայունությունը։ «Արմենպրես»-ի փոխանցմամբ՝ այս մասին հայտարարել է Գերմանիայի խորհրդարանի արտաքին հարաբերությունների հանձնաժողովի նախագահ Միխայել Ռոթը Գերմանիայում Ադրբեջանի դեսպանի հետ զրույցում։

«Ես քիչ առաջ Ադրբեջանի դեսպանին ասացի, որ Ադրբեջանի ռազմական ագրեսիան Լեռնային Ղարաբաղի հայերի դեմ անընդունելի է։ Ալիևը սպառնում է Հայաստանի և Ադրբեջանի միջև խաղաղության շուրջ բանակցություններին, ինչպես նաև վտանգի տակ է դնում ամբողջ տարածաշրջանի կայունությունը», - գրել է նա X-ի իր միկրոբլոգում։

I just told the ambassador of Azerbaijan that military aggression against the Armenians in Nagorno-Karabakh is unacceptable. Aliyev is threatening the peace talks between Armenia + Aserbaijan and risking the stability of the entire region.

— Michael Roth - official (@MiRo_SPD) September 19, 2023

Ադրբեջանի կողմից Արցախի դեմ 2023 թվականի սեպտեմբերի 19-ին սանձազերծված հերթական լայնածավալ ագրեսիայի հետևանքով քաղաքացիական բնակչության շրջանում արձանագրվել է 2 զոհ (1 երեխա), 26 վիրավոր (11 երեխա)։