Փաշինյանը վստահ չէ, որ Բաքվում Ստեփանակերտի հետ երկխոսության համար իրական քաղաքական կամք կա
2 րոպեի ընթերցում
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանը վստհա չէ, որ Բաքվում, բացի հրապարակային հայտարարություններից, նաև իրական քաղաքական կամք կա՝ Ստեփանակերտի հետ երկխոսություն իրականացնելու:
«Արմենպրես»-ի փոխանցմամբ՝ Փաշինյանն այս մասին ասաց լրագրողների հետ զրույցում:
Անդրադառնալով Ստեփանակերտի և Բաքվի միջև հնարավոր երկխոսության համար միջազգային մեխանիզմի գործարկման վերաբերյալ հարցին՝ Փաշինյանն ասաց, որ միջազգային գործընկերները շատ ինտենսիվ աշխատում են այդ թեմաների ուղղությամբ:
«Նաև դա է պատճառը, որ ես էլի շարունակում եմ հորդորել Ստեփանակերտի մեր գործընկերներին, նաև հույս ունենալ, որ նրանք կներգրավվեն այդ երկխոսության մեջ: Իհարկե, հորդորն ուղղված է նաև Բաքվին, որովհետև, եթե կողմերից մեկը չցանկանա, այդ երկխոսությունը տեղի չի ունենա: Եվ ցավոք, այնպես չէ, որ մենք տեսնում ենք, որ Բաքվի կողմից այդ ցանկությունը լիարժեք արտահայտվում է»,-ասաց վաչապետը:
Նա հավելեց՝ Բաքվի կողմից այդ ցանկությունը պաշտոնական մակարդակում արտահայտվում է: Սակայն, վարչապետի խոսքով, մի քանի անգամ նախանշված հանդիպումները տեղի չեն ունեցել, և ինքը փորձել է հասկանալ այդ թվում Ստեփանակերտին ուղղված մեղադրանքները, թե իբր Ստեփանակերտն է տապալել հանդիպումը: «Ես վստահ չեմ, որ Բաքվում, բացի հրապարակային հայտարարություններից, նաև իրական քաղաքական կամք կա այդ երկխոսությունն իրականացնելու»,-ասաց Փաշինյանը: