Դիտորդները ներկա են եղել իրենց պատասխանատվության գոտում կրակոցների միջադեպին․ ԵՄ-ն հաստատեց

ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ։ Հայաստանում Եվրոպական Միության դիտորդական առաքելությունը հաստատել է, որ իրենց դիտորդների պարեկության ժամանակ սահմանին կրակոցներ են արձակվել։

Ինչպես հաղորդում է «Արմենպրես»-ը, այս մասին գրառում է արվել Հայաստանում ԵՄ առաքելության X-ի (նախկինում Twitter) էջում։

«Մենք հաստատում ենք, որ Հայաստանում ԵՄ առաքելության պարեկություն իրականացնող խումբը ներկա է եղել մեր պատասխանատվության գոտում կրակոցների միջադեպին։ ԵՄ առաքելության որևէ դիտորդ չի տուժել»,- ասված է հրապարակման մեջ։

CORRECTING STATEMENT:

We confirm that #EUMA patrol has been present to the shooting incident in our area of responsibility.

No #EUMA member was harmed.

— European Union Mission in Armenia (@EUmARMENIA) August 15, 2023

Հայաստանի պաշտպանության նախարարությունն օգոստոսի 15-ին հաղորդագրություն էր տարածել, որ Ադրբեջանի ԶՈՒ ստորաբաժանումները կրակել են Վերին Շորժայի հատվածում պարեկություն իրականացնող ԵՄ դիտորդների և նրանց ավտոմեքենայի ուղղությամբ։ Դրանից հետո Հայաստանում ԵՄ առաքելությունը հերքեց ՊՆ-ի տարածած հաղորդագրությունը, սակայն կարճ ժամանակ անց, երբ համացանցում հրապարակվեց Հայաստանի պաշտպանական գերատեսչության հաղորդագրությունը հավաստող տեսանյութ, հեռացրեց հերքող գրառումը։