«Ֆրիդոմ Բրոքեր Արմենիա»-ն հայաստանցիներին հնարավորություն է տալիս գործարքներ կատարել աշխարհի խոշորագույն ֆոնդային բորսաներում

ԵՐԵՎԱՆ, 11 ՕԳՈՍՏՈՍԻ, ԱՐՄԵՆՊՐԵՍ: «Ֆրիդոմ Բրոքեր Արմենիա» ընկերությունը Հայաստանում հնարավորություն է ստեղծել հեշտությամբ մուտք գործել Նյու Յորքի, Լոնդոնի, Չիկագոյի ու այլ խոշորագույն ֆոնդային բորսաներ, արժեթղթերի շուկայում կատարել ներդրումներ ու դառնալ, օրինակ, համաշխարհային ընկերություններից մեկի համասեփականատեր:

Իսթե ինչպես ու ինչու ներդրումներ կատարել արժեթղթերի շուկայում, ինչպես է օգնում «Ֆրիդոմ Բրոքեր Արմենիա»-ն այդ գործում, «Արմենպրես»-ի հետ զրույցում պատմել է «Ֆրիդոմ Ֆինանս Արմենիա» ՍՊ ներդրումային ընկերության տնօրեն Հովակ Հովակիմյանը:

-Պարոն Հովակիմյան, Freedom Holding Corporation-ի անդամ «Ֆրիդոմ Բրոքեր Արմենիա» ընկերությունը ի՞նչ գործունեություն է ծավալում Հայաստանում, ո՞րն է ձեր առաքելությունը, ներդրումային այս ընկերությունն արդեն որքա՞ն ժամանակ է գործում Հայաստանում:

-«Ֆրիդոմ Բրոքեր Արմենիա»-ն Հայաստանի կենտրոնական բանկի կողմից լիցենզավորված ֆինանսական կազմակերպություն է՝ ներդրումային ծառայություններ մատուցող ընկերություն, որի միակ մասնակիցը հանդիսանում է Freedom Holding Corporation-ը։

Freedom Holding Corp.-ը գրանցված է ԱՄՆ-ում և ցուցակված է աշխարհի ամենախոշոր բորսայում՝ Nasdaq-ում: Nasdaq-ը բորսա է, որը միավորում է խոշորագույն տեխնոլոգիական ընկերությունների, ինչպիսիք են Microsoft-ը, Apple-ը, Google-ը, Facebook-ը և այլն: Նման բորսայում ցուցակված լինելն առնվազն հավելյալ վստահություն է հաղորդում պոտենցիալ և ներկա հաճախորդներին՝ ներդրողներին, քանի որ այնտեղ ցուցակված բոլոր ընկերությունները վերահսկվում են ԱՄՆ արժեթղթերի հանձնաժողովի կողմից: Չեմ վարանի ասել՝ սա աշխարհի ամենախիստ վերահսկող մարմինն է։ Յուրաքանչյուր երկրում, որտեղ Freedom Holding Corp.-ը ստեղծել է ներդրումային ընկերություններ, բոլորը լիցենզավորված են տեղի կարգավորող և վերահսկող մարմինների կողմից, բայց այն փաստը, որ ԱՄՆ արժեթղթերի հանձնաժողովն է հանդիսանում Հոլդինգին վերահսկող անմիջական մարմինը, իսկ վերջերս էլ հենց ամենախոշոր աուդիտորական ընկերություններից մեկը՝ Deloitte-ը, սկսել է անցկացնել Ընկերության աուդիտը, ինչը լրացուցիչ վստահություն է հաղորդում մեր ընկերության նկատմամբ: Հարկ է նշել, որ Հայաստանում «Ֆրիդոմ Բրոքեր Արմենիա»-ն բրոքերային գործունեության լիցենզիան ստացել է 2021-ի նոյեմբերի 9-ին: Իսկ 2022-ի հոկտեմբերի 4-ին լիցենզիան վերաձևակերպվել է, որի շնորհիվ մեզ իրավունք է տրվել իրականացնել բրոքերային և պահառության գործունեություն, այսինքն՝ արժեթղթերի պահպանում և ներդրումների հետ կապված աջակցություն: 2023-ի փետրվարին արդեն գրանցվել է առաջին հաճախորդը: Ընդհանուր առմամբ, ընկերությունը աշխարհի տարբեր երկրների բորսաներ մուտք գործելու հնարավորություն սկսել է տալ 2023-ի փետրվարից:

Նախ հասկանանք, թե ով է բրոքերը: Բրոքերը հանդիսանում է միջնորդ՝ ներդրողի և բորսայի միջև: «Ֆրիդոմ Բրոքեր Արմենիա»-ն մեծ առավելություն ունի, քանի որ կարող է ուղիղ մուտքի հնարավորություն տալ դեպի աշխարհի ամենամեծ ֆոնդային բորսաներ, այդ թվում՝ Նյու Յորքի ֆոնդային բորսա, ՆԱՍԴԱՔ ֆոնդային բորսա, նաև եվրոպական ու ասիական բորսաներ, օրինակ՝ Լոնդոնի, Ֆրանկֆուրտի, Հոնկոնգի ֆոնդային բորսաներ: Այսինքն՝ պոտենցիալ ներդրողը՝ մեր ընկերության հաճախորդը, կարող է հասանելիություն ստանալ այդ բոլոր բորսաներին: Առաջիկայում հնարավոր կլինի այս ցանկին ավելացնել նաև Հայաստանի ֆոնդային բորսան: Անհամբերությամբ եմ սպասում այդ իրադարձությանը, քանի որ կարծում եմ՝ մենք կլինենք նրանցից մեկը, ով կզարգացնի այն։

-Ովքե՞ր կարող են օգտվել ձեր ծառայություններից, ի՞նչ առաջարկներ եք դուք ներկայացնում հայաստանցիներին:

«Ֆրիդոմ Բրոքեր Արմենիա»-ն բրոքերային ընկերություն է, որը ներդրումային ծառայություններ է մատուցում թե՛ ֆիզիկական,և թե՛ իրավաբանական անձանց համար ։ Մեր հաճախորդը կարող է դառնալ յուրաքանչյուրը, ով հետաքրքրված է տարբեր բորսաներում ներդրումներով, արժեթղթերի առքուվաճառքով, ֆինանսական գործիքների դիվերսիֆիկացմամբ,երկարաժամկետ ներդրումներով և այլն:

-Ազատ դրամական միջոցների շահավետ ներդրման ու ավելացման ի՞նչ հնարավորություններ է առաջարկում ձեր ընկերությունը:

- Ինչպես արդեն ասացի՝ Freedom Holding Corporation-ը, որի անդամ է հանդիսանում «Ֆրիդոմ Բրոքեր Արմենիա»-ն, ցուցակված է ամենամեծ՝ Nasdaq բորսայում: Այն մուտքի հնարավորություն է տալիս դեպի տարբեր բորսաներ: Պոտենցիալ ներդրողը կարող է գնել արժեթղթեր՝ բաժնետոմսեր, պարտատոմսեր և այլ ֆինանսական գործիքներ: Բաժնետոմսերի գնման դեպքում հաճախորդը դառնում է տվյալ ընկերության համասեփականատեր, իսկ պարտատոմսերի դեպքում՝ տվյալ ընկերության պարտատեր: Պատկերացրեք, երբ, օրինակ, մենք բանկում ավանդ ենք ներդնում, նշանակում է, որ բանկին պարտք ենք տալիս՝ որոշակի տարեկան տոկոսադրույքով: Բայց, օրինակ, կարելի է պարտքը տալ ոչ թե բանկին, այլ օրինակ՝ Apple ընկերությանը, Հայաստանի կառավարությանը և այլն: Կամ կարելի է դառնալ, օրինակ, Apple ընկերության համասեփականատեր: Պատկերացրեք՝ Apple-ը տարբեր երկրներում վաճառում է սմարթֆոններ, իր ծառայությունները, իսկ մենք՝ որպես այդ ընկերության համասեփականատեր, և ստանում ենք այդ շահույթից մի մաս: Ամերիկյան և դեպի այլ օտարերկրյա բորսաներ մուտքը հնարավորություն է տալիս նման ընկերության համասեփականատեր դառնալ ձեռք բերելով նրանց բաժնետոմսերը:

-Իսկ ձեր ընկերությունն ինչո՞վ է առանձնանում շուկայում գործող այլ ընկերություններից:

- Հայաստանում նման ծառայություններ մատուցող ընկերությունների շարքում մենք առաջատար ենք: Եթե, օրինակ, անձը ցանկանում է ձեռք բերել Հայաստանի պետական ​​պարտատոմսեր, ապա ստիպված պետք է լինի անցնել բավականին բարդ ճանապարհ: Մենք հաճախորդին առաջարկում ենք մեր Tradernet Armenia հավելվածի միջոցով հեշտությամբ մուտք գործել հաշիվ և գնել իրեն հարմար արժեթուղթը: Առանձնացնեմ նաև կապիտալի շուկայում մեր տարիների փորձը: Մեզ մոտ աշխատում են պրոֆեսիոնալ ֆինանսիստներ-աջակիցներ։ Այսինքն՝ հաճախորդը միայնակ չի մնում: Պատկերացրեք՝ հաճախորդը մտնում է արժեթղթերի շուկա, բայց քիչ բան է հասկանում դրանից, դրա համար նրան անհրաժեշտ է օգնություն։ Հենց այդ օգնությունը՝ աջակցությունն էլ մենք նրան տրամադրում ենք՝ մեր պրոֆեսիոնալ ֆինանսիստների միջոցով: Առանձնանում ենք նաև նրանով, որ հասանելիություն ենք ապահովում աշխարհի տարբեր խոշորագույն բորսաներ և սկզբից մինչև վերջ հաճախորդին ուղեկցում ենք՝ արժեթղթերի շուկայում գործարքներ կատարելիս:

- Freedom Holding Corporation-ը ներկայացված է աշխարհի 14 երկրում՝ ԱՊՀ երկրներում, Եվրոպայում, ԱՄՆ-ում, ինչո՞ւ է ընկերությունն այդ ցանկում ներառել նաև Հայաստանը, ի՞նչ հնարավորություններ են տեսել մեր երկրում:

-Մենք հավատում ենք Հայաստանի մեծ տնտեսական աճի պոտենցիալին: Հայաստանը զարգանում է բավականին արագ տեմպերով, սակայն առանց ֆինանսական և կապիտալի շուկայի զարգացման այդ աճը լիարժեք չի լինի: Եվ այստեղ պետք են պրոֆեսիոնալ «խաղացողներ», ովքեր կարող են տալ իրենց տեխնոլոգիական լուծումները՝ ինչպես ֆինանսական կապիտալի հասանելիության, այնպես էլ ֆինանսական կրթական արտադրանքի առումով։ ԱՄՆ-ում, օրինակ, ընտանիքների 80 տոկոսն ունի բրոքերային հաշիվներ: Հայաստանում մենք ևս ցանկանում ենք ստեղծել նման հնարավորություն։ Սակայն պետք է նշեմ,որ պարզապես ֆոնդային բորսաներ մուտքի հնարավորություն կարող են տալ շատերը, իսկ մենք նաև հաճախորդներին ուղեկցում ենք իր առաջին գործարքից մինչև վերջնական արդյունք:

-Եվ վերջում, պարոն Հովակիմյան, ինչո՞ւ ներդրումներ կատարել արժեթղթերում, ի՞նչ հնարավորություններ այն կտա:

-Ներդրումները կարող են ձեր երկարաժամկետ նպատակների իրականացման համար լավ աղբյուր լինել: Արժեթղթերում ներդրումները թույլ են տալիս լինել ընկերության համասեփականատերկամ պարտատեր: Արժեթղթերում ներդրումներ կատարելը նաև թույլ է տալիս ռիսկերը բաշխել տարբեր ֆինանսական գործիքներում: Դուք, օրինակ, ունենալով մեծ դրամական միջոցներ, կարող եք Վիեննայում բնակարան գնել՝ դա համարելով լավ ներդրում: Կարող եք գնել նաև ոչ թե մեկ բնակարան, այլ 5000 տարբեր բնակարաններ ԱՄՆ-ում: Նույն օրինակով մենք դիվերսիֆիկացնում ենք հաճախորդի ակտիվները՝ աջակցելով ներդրումները կատարել տարբեր ֆինանսական գործիքներում միաժամանակ: Հաջորդ առավելությունն իրացվելիությունն է: Այսինքն՝ մեր հաճախորդները բավականին արագ կարող են իրենց ներդրումներից ստանալ ֆինանսական շահ: Օրինակ՝ Հայաստանում բնակարան գնելը գուցե լավ ներդրում է, բայց կա իրացվելիության խնդիր, այն բավականին դժվար է հետագայում վաճառել: Իսկ արժեթղթերի շուկայում այդ իրացվելիությունը ձեռք է բերվում ընդամենը մեկ կոճակի սեղմումով: Կա նաև ճկունության հարց: Հաճախորդը կարող է իր ակտիվները բաշխել տարբեր ընկերություններում, և ամենևին էլ պարտադիր չէ ակտիվները բաշխել միայն մեկ ընկերությունում: Բացի այդ՝ արժեթղթերի շուկան բաղկացած է տարբեր գործիքներից: Եթե հաճախորդը պահպանողական է, նա կարող է ընտրել աշխարհի ամենապահպանողական գործիքը, եթե ուզում է ավելի մեծ եկամտաբերություն՝ բայց ավելի բարձր ռիսկով, այդ հնարավորությունը ևս տրված է: Շատ կարևոր է այն հանգամանքը, որ «Ֆրիդոմ Բրոքեր Արմենիա»-ն միայն հաճախորդի «ռիսկի ախորժակն» իմանալուց հետո է հաճախորդին առաջարկ ներկայացնում: Կարող է առաջարկվել և՛ սուպեր ագրեսիվ պորտֆել, և՛ սուպեր պահպանողական պորտֆել: