Ադրբեջանը դրական է պատասխանել սահմանազատման հանձնաժողովների հանդիպման մասին Հայաստանի առաջարկին․ ՀՀ փոխվարչապետ
1 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ։ Ադրբեջանական կողմը դրական է արձագանքել սահմանազատման հարցերով հանձնաժողովների աշխատանքային հանդիպման մասին Հայաստանի առաջարկին։ Ինչպես տեղեկացնում է «Արմենպրես»-ը, Ազգային ժողովում լրագրողների հետ ճեպազրույցում այս մասին ասաց փոխվարչապետ Մհեր Գրիգորյանը՝ պատասխանելով հարցին, թե Ադրբեջանի փոխվարչապետ Շահին Մուստաֆաևն արձագանքե՞լ է իր՝ սահմանազատման հարցերով հանձնաժողովների աշխատանքային հանդիպում անցկացնելու առաջարկին։
«Այո, դրական պատասխան է տվել։ Հանդիպման վայրի ու ժամանակահատվածի վերաբերյալ պայմանավորվածություն դեռ չկա, բայց ենթադրում ենք, որ մոտ ժամանակներում հանդիպում կունենանք»,- ասաց Գրիգորյանը։
Ավելի վաղ, ՀՀ փոխվարչապետ Մհեր Գրիգորյանն Ադրբեջանի փոխվարչապետ Շահին Մուստաֆաևին առաջարկ է ուղարկել՝ անցկացնել Հայաստանի ու Ադրբեջանի միջև սահմանազատման հարցերով հանձնաժողովների հանդիպում:
Առաջարկի նպատակն է՝ քննարկել ընթացիկ խնդրահարույց հարցերը, որոնք հայ-ադրբեջանական սահմանին առաջացնում են լարվածություն: