ԼՂ հայերի անվտանգ ապրելու իրավունքը պետք է կենտրոնական նշանակություն ունենա բանակցություններում. Միխայել Ռոթ
1 րոպեի ընթերցում
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Լեռնային Ղարաբաղի հայերի անվտանգ ապրելու իրավունքը պետք է տևական խաղաղության շուրջ բանակցությունների կենտրոնական բաղադրիչը լինի: «Արմենպրես»-ի փոխանցմամբ՝ այս մասին Երևանում ասուլիսում շեշտեց Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթը:
«Եթե մենք դիտարկում ենք տևական խաղաղության հասնելու երկուստեք ջանքերը, այսինքն՝ բանակցությունները, ապա այս հարցը պետք է կենտրոնական նշանակություն ունենա բանակցություններում: Մենք մեծապես գնահատում ենք ԼՂ հայերի անվտանգ ապրելու իրավունքը: Եվ համարում ենք, որ սա պետք է տևական խաղաղության շուրջ բանակցությունների կենտրոնական բաղադրիչը լինի»,-ասաց նա:
Ռոթն ավելի վաղ ընդգծել էլ, որ չպետք է երբեք թույլ տալ, որ Լեռնային Ղարաբաղում տեղի ունենան էթնիկ զտումներ: Անդրադառնալով հարցին, թե ի՞նչը կարող է զսպման մեխանիզմ լինել՝ նա պատասխանեց, որ որպես մեխանիզմ առաջին հերթին պետք է դիտարկել Ադրբեջանի կամքն ու պատրաստակամությունը:
