Վաշինգտոնում ավարտվում են Հայաստանի և Ադրբեջանի բանակցությունները․ եզրափակիչ փուլին կմասնակցի նաև ԱՄՆ պետքարտուղարը
1 րոպեի ընթերցում
ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ։ Վաշինգտոնում Հայաստանի և Ադրբեջանի միջև բանակցությունների վերջին օրը քննարկումներին կմիանա նաև ԱՄՆ պետքարտուղար Էնթոնի Բլինքենը։
«Արմենպրես»-ի փոխանցմամբ՝ այս մասին հայտնում է ԱՄՆ պետդեպարտամենտը։
ԱՄՆ պետքարտուղարի՝ մայիսի 4-ի աշխատանքային գրաֆիկում է նաև Հայաստանի և Ադրբեջանի արտաքին գործերի նախարարներ Արարատ Միրզոյանի և Ջեյհուն Բայրամովի հետ հանդիպումը՝ խաղաղության երկկողմ բանակցությունների եզրափակիչ նիստի շրջանակներում։
ԱՄՆ պետքարտուղարի, Հայաստանի և Ադրբեջանի արտաքին գործերի նախարարների եռակողմ հանդիպումը կկայանա Ջորջ Շուլցի անվան արտաքին գործերի ուսումնական կենտրոնում։
Էնթոնի Բլինքենը Հայաստանի և Ադրբեջանի ԱԳ նախարարների հետ հանդիպել էր նաև բանակցությունների առաջին օրը՝ մայիսի 1-ին։ Նա նախ առանձին հանդիպումներ էր ունեցել Հայաստանի ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի հետ, իսկ այնուհետև կայացել էր Բլինքեն-Միրզոյան-Բայրամով եռակողմ հանդիպումը։