1 րոպեի ընթերցում
ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: 93 տարեկան հասակում վախճանվել է բրիտանացի դիզայներ Մերի Քուանթը՝ մինի կիսաշրջազգեստների հեղինակը: Այս մասին հաղորդում է «Արմենպրես»-ը՝ վկայակոչելով Sky News պարբերականին:
Մերի Քուանթի մահվան լուրը հաստատել է նրա ընտանիքը։
Քուանթը ծնվել է 1930 թվականին Լոնդոնում` ուսուցիչների ընտանիքում։ Հենց Քուանթը դարձավ այն դիզայները, որը նորաձևության մեջ մտցրեց մինի կիսաշրջազգեստներ և կարճ շորտեր կրելը: 1955 թվականին նա ամուսնու հետ իր առաջին Bazaar խանութը բացեց Լոնդոնում, որն արագ հայտնի դարձավ և նրանց թույլ տվեց ապագայում ընդլայնել իրենց վաճառքները Եվրոպայում ու Միացյալ Նահանգներում:
Bazaar-ն իր ոճով Լոնդոնի եզակի խանութներից մեկն էր, որտեղ միշտ միացված էր բարձր երաժշտություն, իսկ այցելուներին առաջարկվում էին անվճար խմիչքներ:
Բացի հագուստի դիզայնից, Քուանթը նաև զբաղվել է ակնոցների և կոսմետիկայի արտադրությամբ։