Ադրբեջանում փորձում են հերքել անհերքելին․ այդ երկրի դեսպանը Նիդերլանդների ԱԳՆ կանչվել է

ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ։ Ադրբեջանական քարոզչամեքենան հերթական կեղծիքն է տարածել՝ փորձելով մոլորեցնել ինչպես սեփական, այնպես էլ միջազգային հանրությանը։

Ադրբեջանի արտաքին գործերի նախարարի մամուլի խոսնակ Այխան Հաջիզադեն հայտարարել է, թե կեղծ է հայկական լրատվամիջոցների տարածած լուրը, որ Նիդերլանդներում Ադրբեջանի դեսպանը հրավիրվել է Նիդերլանդների ԱԳՆ՝ կապված Լաչինի միջանցքի վերաբերյալ Արդարադատության միջազգային դատարանի որոշումը չկատարելու հետ։

Ադրբեջանի ԱԳՆ խոսնակը հայտարարել է, որ «այդ լուրը հայկական լրատվամիջոցների տարածած հերթական կեղծիքն է և չի համապատասխանում իրականությանը»։ «Դեսպանը Նիդերլանդների ԱԳՆ չի կանչվել։ Դեսպանի վերջին հանդիպումն արտաքին գործերի նախարարությունում կայացել է մարտի 15-ին՝ նրա նախաձեռնությամբ»,- ասել է Հաջիզադեն։

Ադրբեջանում հավանաբար մոռացել են, որ կան բաց և հրապարակային պաշտոնական աղբյուրներ, որտեղ կարելի է ստուգել ցանկացած տեղեկատվություն։ Նիդերլանդների կառավարության կայքում հրապարակված է այդ երկրի արտաքին գործերի նախարար Վոբկե Հոկստրայի գրավոր պատասխանները խորհրդարանականների հարցերին․ պատգամավորների հարցերից մեկին ի պատասխան Հոկստրան նշել է, որ Ադրբեջանի դեսպանը հրավիրվել է Նիդերլանդների ԱԳՆ։

Նիդերլանդների խորհրդարանում նախարարի հետ հարցուպատասխանը վերաբերել է Արդարադատության միջազգային դատարանի կողմից Լաչինի միջանցքի վերաբերյալ որոշումն Ադրբեջանի կողմից չկատարելուն։ Նախարարին հարցրել են՝ արդյոք մտադիր է Դատարանի կայացրած որոշումն Ադրբեջանի կողմից չկատարելու վերաբերյալ դիմել Ադրբեջանի դեսպանին, ինչին ի պատասխան՝ Հոկստրան նշել է․

«Այո, ինչպես նախկինում ասվել է, փետրվարի 28-ին Ադրբեջանի դեսպանը հրավիրվել է արտաքին գործերի նախարարություն այդ հարցով քննարկման համար, որպեսզի կատարվի ՄԱԿ-ի միջազգային դատարանի որոշումը։ Խոսակցության ընթացքում Նիդերլանդներն Ադրբեջանին կոչ է արել ենթարկվել միջազգային դատարանի որոշմանը։ Այդ խոսակցության ընթացքում բարձրացվել է նաև հարցը, որ որոշման վերաբերյալ Ադրբեջանի տված սահմանափակ բացատրությունները Նիդերլանդները չի կիսում, և Դատարանի որոշումն ամբողջությամբ պետք է կատարվի»։