Ամենայն Հայոց կաթողիկոսը Թուրքիայում տեղի ունեցած երկրաշարժի առնչությամբ իր ցավակցությունն է հայտնել Պոլսո Հայոց պատրիարքին
1 րոպեի ընթերցում
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Երկրորդ Ամենայն Հայոց կաթողիկոսը փետրվարի 6-ին Թուրքիայում տեղի ունեցած ավերիչ երկրաշարժի կապակցությամբ իր ցավակցությունն է հայտնել Պոլսո Հայոց պատրիարք Տ. Սահակ Բ. Մաշալյանին:
Ինչպես «Արմենպրես»-ը տեղեկանում է պատրիարքարանի տարածած հաղորդագրությունից, Ամենայն Հայոց կաթողիկոսը համբերություն է մաղթել բոլոր նրանց, ովքեր մարդկային ու նյութական կորուստ են կրել: Կաթողիկոսը հայտնել է, որ կաղոթի բոլոր զոհվածների հոգիների համար:
Գարեգին երկրորդը հետաքրքրվել է երկրաշարժից ավերված շրջաններում բնակվող հայ համայնքի անդամների որպիսությամբ: Պոլսո պատրիարքը տեղեկություններ է տվել և շնորհակալություն հայտնել Հայրապետական հոգատարության համար:
Պատրիարքին իրենց ցավակցություններն են հայտնել նաև Գուգարաց թեմի առաջնորդ Գերշ. Տ. Հովնան եպսկ. Հակոբյանը եւ Ամերիկայի Արևելյան թեմի առաջնորդ Հոգշ. Տ. Մեսրոպ վրդ. Պարսամյանը։