ՀՀ նախագահին հավատարմագրերն է հանձնել Հայաստանում Դանիայի նորանշանակ դեսպանը
1 րոպեի ընթերցում
![ՀՀ նախագահին հավատարմագրերն է հանձնել Հայաստանում Դանիայի նորանշանակ դեսպանը](http://armenpress.am/resized/480/static/news/b/2023/01/1102639.jpg)
ԵՐԵՎԱՆ,26 ՀՈՒՆՎԱՐԻ,ԱՐՄԵՆՊՐԵՍ:Հանրապետության նախագահ Վահագն Խաչատուրյանին հավատարմագրերն է հանձնել Հայաստանում Դանիայի Թագավորության արտակարգ և լիազոր դեսպան Թովթ Սորենսենը (նստավայրը՝ Թբիլիսի):
Ինչպես «Արմենպրես»-ին հայտնում են նախագահի աշխատակազմից, Խաչատուրյանը շնորհավորել է նորանշանակ դեսպանին պատասխանատու պաշտոնում նշանակվելու կապակցությամբ և հույս հայտնել, որ նրա պաշտոնավարման ընթացքում հայ-դանիական հարաբերությունները կարձանագրեն զարգացման դրական դինամիկա։
Հանդիպման ընթացքում երկուստեք կարևորվել է տարածաշրջանում կայուն և երկարատև խաղաղության հաստատման անհրաժեշտությունը՝ այդ համատեքստում ողջունելի է համարվել Հայաստան Եվրոպական միության կողմից նոր դիտորդական առաքելություն ուղարկելու որոշումը։ Անդրադարձ է կատարվել նաև Ադրբեջանի կողմից Լաչինի միջանցքի արգելափակման հետևանքով Լեռնային Ղարաբաղում ստեղծված հումանիտար իրավիճակին և օր առաջ ապօրինի շրջափակումը դադարեցնելու անհրաժեշտությանը:
Զրուցակիցները նշել են, որ Հայաստանը և Դանիան համագործակցության խորացման մեծ ներուժ ունեն և փոխշահավետ ծրագրեր կարող են իրականացնել մի շարք ոլորտներում, մասնավորապես՝ բարձր տեխնոլոգիաների, մշակույթի, զբոսաշրջության և այլ բնագավառներում: