Աժ պատգամավոր Գևորգ Պապոյանն ու Արագածոտնի մարզպետը Թալինում ծանոթացել են սուբվենցիոն ու պետական ծրագրերով իրականացված աշխատանքներին

ԵՐԵՎԱՆ,13 ՀՈՒՆՎԱՐԻ,ԱՐՄԵՆՊՐԵՍ: Արագածոտնի մարզպետ Սերգեյ Մովսիսյանը Ազգային ժողովի պատգամավոր Գևորգ Պապոյանի հետ հունվարի 12-ին Թալին համայնքում ծանոթացել է սուբվենցիոն և պետական ծրագրերով 2022-ին իրականացված ծավալուն աշխատանքներին:

Ինչպես «Արմենպրես»-ը տեղեկանում է մարզպետարանի տարածած հաղորդագրությունից, պետական այրերը Թալինի համայնքապետ Տավրոս Սափեյանի հետ նախ այցելել են Դավթաշեն բնակավայր, ծանոթացել են սուբվենցիոն ծրագրի շրջանակում իրականացված ներփողոցային ասֆալտապատման աշխատանքներին․ ընդհանուր ասֆալտապատվել է 1900 մ տարածք, ծրագրի արժեքն է 185․038․000 ՀՀ դրամ։

Պաշտոնատար անձինք հաջորդիվ այցելել են Դավթաշենի Ա․ Վարդանյանի անվան միջնակարգ դպրոց, ծանոթացել են ՀՀ կառավարության որոշմամբ, անհետաձգելի համարվող կապիտալ ծախսերի ծրագրով հիմնանորոգված մարզադահլիճին։

Դիտարկվել է նաև Թալին համայնքում սուբվենցիոն մեկ այլ ծրագրի արդյունքը՝ Շահումյան փողոցի հարակից բազմաբնակարան շենքերի տարածքում կառուցված պուրակը։

Նշվում է, որ 39․528․000 ՀՀ դրամի ներդրմամբ, կառավարություն-համայնք փոխգործակցության արդյունքում Թալինն ունի նորաոճ պուրակ, որն արդեն այս տարվա գարնանը կկանաչապատվի ու բնակիչների համար կդառնա քաղաքի ամենացանկալի վայրերից մեկը։

Շրջայցի ընթացքում մարզպետն ու ԱԺ պատգամավոր Գևորգ Պապոյանը խոստացել են պետական օժանդակությամբ նորանոր սպասված ծրագրեր կյանքի կոչել: