Հայտնի են ՀՀ-ում անցկացված «Խաղաղության մարտիկ» մրցույթի հաղթողները. Արմինե Գրիգորյանը երրորդն է անհատական հաշվարկում
3 րոպեի ընթերցում
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Մոնթե Մելքոնյանի անվան ռազմամարզական վարժարանում օգոստոսի 25-ին տեղի ունեցավ «Խաղաղության մարտիկ» միջազգային մրցույթի փակման հանդիսավոր արարողությունը, որին մասնակցել են ՀՀ պաշտպանության նախարարի տեղակալ Արման Սարգսյանը, ՌԴ պաշտպանության նախարարի տեղակալ, գեներալ-գնդապետ Վիկտոր Գորեմիկինը, բարձրաստիճան զինվորականներ, ՀՀ-ում հավատարմագրված դիվանագիտական ներկայացուցչությունների ղեկավարներ և ռազմական կցորդներ:
Ինչպես «Արմենպրես»-ին տեղեկացրին ՀՀ պաշտպանության նախարարությունից, «Խաղաղության մարտիկ» մրցույթի մրցավարական հանձնաժողովը հայտարարել է ընդհանուր հաշվարկով առաջատար թիմերը, ինչպես նաև առանձին մրցաձևերում անհատական հաշվարկով լավագույն ցուցանիշներ գրանցած զինծառայողների անունները:
«Թիմային ընդհանուր հաշվարկով մրցույթում երրորդ հորիզոնականն է զբաղեցրել Բելառուսի Հանրապետության զինված ուժերի թիմը, երկրորդ հորիզոնականում Ռուսաստանի Դաշնության զինված ուժերի թիմն է: «Խաղաղության մարտիկ-2022» մրցույթում հաղթող է ճանաչվել Ղազախստանի Հանրապետության զինված ուժերի հավաքական թիմը՝ տանելով վստահ և վաստակած հաղթանակ»,- նշվում է հաղորդագրության մեջ:
Ըստ աղբյուրի՝ անհատական հաշվարկով կին զինծառայողների մեջ լավագույնը ՌԴ թիմից եֆրեյտոր Մարինա Գովորն է: Երկրորդ տեղում Ղազախստանի մասնակիցն է՝ շարքային Նազիրա Ալբոնիսովան, ՀՀ զինված ուժերի թիմից կապիտան Արմինե Գրիգորյանը երրորդն է: Տղամարդկանց անհատական պայքարում հաղթող է ճանաչվել Բելառուսի թիմի անդամ, սերժանտ Իլյա Պուտատոն: Մրցանակային երկրորդ և երրորդ տեղերը Ղազախստանինն են՝ ավագ սերժանտներ Դարխան Ասլան և Տուրար Տիլեգենով:
Նշվում է, որ մրցանակակիրները պարգևատրվել են գավաթներով, մեդալներով և արժեքավոր նվերներով: Միջոցառումը եզրափակվել է ՀՀ զինված ուժերի երգի ու պարի համույթի կատարումներով:
Զինծառայողների ռազմամասնագիտական վարպետության «Խաղաղության մարտիկ» միջազգային մրցույթն անցկացվում է «Միջազգային բանակային խաղեր» մրցաշարի շրջանակում՝ ԱՊՀ մասնակից պետությունների պաշտպանության նախարարների խորհրդի որոշմամբ և ՌԴ պաշտպանության նախարարության ու ԱՊՀ մասնակից պետությունների պաշտպանության նախարարությունների երկկողմ համագործակցության պլանների համաձայն: Հինգերորդ տարին անընդմեջ «Խաղաղության մարտիկն» անցկացվում է Հայաստանի Հանրապետությունում: